Djali i madh i David dhe Victoria Beckham ndërpret papritur kontaktet në rrjete sociale, ndërsa vëllai Cruz konfirmon se e gjithë familja është përjashtuar pa asnjë paralajmërim
Një tjetër kapitull i dhimbshëm është hapur në përplasjen familjare të Beckhamëve, pasi Brooklyn Beckham ka bllokuar në Instagram të gjithë familjen e tij, përfshirë prindërit David Beckham dhe Victoria Beckham, si edhe motrën e mitur Harper. Lajmi është konfirmuar publikisht nga vëllai i tij, Cruz Beckham, i cili reagoi pas spekulimeve për një përçarje të re brenda familjes.
Sipas Cruz, prindërit dhe fëmijët e tjerë u zgjuan një mëngjes dhe kuptuan se ishin bllokuar nga profili i Brooklyn pa asnjë paralajmërim. Ai theksoi se David dhe Victoria nuk do ta hiqnin kurrë nga ndjekja djalin e tyre dhe se vendimi erdhi vetëm nga Brooklyn.
Në të njëjtën linjë duket se ka vepruar edhe bashkëshortja e tij, Nicola Peltz, e cila nuk ndjek më asnjë anëtar të familjes Beckham në rrjetet sociale. Kjo ka shtuar zërat për një krisje serioze mes çiftit dhe pjesës tjetër të familjes, e cila është bërë gjithnjë e më e dukshme muajt e fundit.
Marrëdhëniet mes palëve janë ftohur ndjeshëm që prej mungesës së Brooklyn dhe Nicola në disa momente kyçe familjare, përfshirë ceremonitë e rëndësishme të babait të tij dhe rinovimin e betimeve martesore të çiftit në Nju Jork, ku asnjë anëtar i familjes Beckham nuk ishte i pranishëm. Burime pranë familjes bëjnë me dije se kjo situatë ka prekur veçanërisht më të voglën, Harper, e cila ndjen mungesën e vëllait të saj të madh.
Megjithë tensionet, Victoria Beckham raportohet se po përpiqet të mos lejojë që kjo përçarje ta errësojë atmosferën e festave të fundvitit, ndërsa shpresat për një pajtim mbeten të pakta. Sipas burimeve, familja ende shpreson për një kontakt minimal gjatë Krishtlindjeve, të paktën me gjyshërit, edhe pse marrëdhënia mes nënës dhe djalit duket në pikën më të ulët.
Saga e familjes Beckham po kthehet në një nga historitë më të ndjekura të showbizit britanik, duke treguar se edhe familjet më të famshme nuk janë të imunizuara nga konfliktet e thella personale.
About the Author
