Debatet e brendshme u ashpërsuan gjatë mbledhjes me dyer të mbyllura, ku u vunë në pikëpyetje aftësitë organizative dhe shpenzimet e partisë
Mbledhja e Kryesisë së Partisë Demokratike është shoqëruar nga tensione të forta dhe replika të drejtpërdrejta mes figurave kryesore të saj, duke nxjerrë në pah përçarjet e thella brenda forcës politike. Në qendër të debatit kanë qenë Sali Berisha, Ervin Salianji dhe Flamur Noka, ndërsa diskutimi ka marrë një ton edhe më të ashpër pas ndërhyrjes së Bislim Ahmetajt.
Ahmetaj, i vetmi anëtar që doli hapur në mbështetje të Ervin Salianjit, ka kujtuar se në të kaluarën nuk ka qenë dakord me veprimet e tij, veçanërisht gjatë përplasjeve për selinë e PD-së, kur Salianji ishte pjesë e grupit që, bashkë me Berishën, tentoi të rimerrte kontrollin nga Lulzim Basha. Ai përmendi edhe episodin kur Salianji ishte paraqitur në seli me një shkop bejsbolli, duke nënvizuar se pavarësisht kundërshtive personale, Salianji ka aftësi për të mobilizuar mbështetës në terren.
Në këtë kontekst, Ahmetaj iu drejtua drejtpërdrejt Flamur Nokës, duke vënë në dyshim kapacitetin e tij për të mbledhur njerëz dhe për të krijuar mbështetje reale për partinë. Ai përdori tone ironike për të kritikuar prioritetet e PD-së, duke theksuar se, sipas tij, partia shpenzon më shumë energji dhe burime për privilegje personale sesa për kontaktin me qytetarët.
Sipas Ahmetajt, mbajtja e Nokës me një automjet luksoz me vlerë të lartë përfaqëson një simbol të keqmenaxhimit dhe të largimit nga baza, ndërkohë që fokusi duhet të ishte te organizimi i takimeve dhe forcimi i lidhjes me elektoratin. Këto deklarata janë bërë gjatë një mbledhjeje me dyer të mbyllura, por kanë nxjerrë në pah një klimë të tensionuar dhe një debat të hapur mbi drejtimin, prioritetet dhe funksionimin e Partisë Demokratike.
About the Author
