Përshkallëzohet frika për Luftën e Tretë Botërore: Aleati i Putinit kërcënon Evropën me shkatërrim

Propagandisti i Kremlinit rendit kryeqytetet që sipas tij mund të goditen dhe paralajmëron Perëndimin të mos fajësojë Rusinë

Frika për një përshkallëzim të konfliktit global është rritur ndjeshëm pas deklaratave të reja kërcënuese nga një prej figurave më të njohura të propagandës ruse, i cili në një dalje televizive ka lëshuar paralajmërime të drejtpërdrejta ndaj disa vendeve evropiane. Vladimir Solovyov, i konsideruar si një nga zërat më të afërt të Kremlinit, ka përmendur kryeqytete si Berlini, Parisi dhe Vjena si objektiva të mundshme në rast të një përballjeje të hapur mes Rusisë dhe Perëndimit.

Në fjalën e tij, Solovyov ka deklaruar se një goditje ndaj Britanisë së Madhe do të ishte e pashmangshme nëse Moska do të ndjehej e detyruar të vepronte, duke shtuar se Rusia nuk kërkon konflikt, por do të reagojë nëse provokohet. Sipas tij, Perëndimi nuk duhet të fajësojë Moskën për pasojat e një përshkallëzimi të tillë.

Deklaratat vijnë në një moment kur tensionet mes Rusisë dhe vendeve të NATO-s janë në nivelet më të larta të viteve të fundit, për shkak të luftës në Ukrainë dhe mbështetjes ushtarake që Perëndimi po i jep Kievit. Paralelisht, udhëheqës ushtarakë dhe politikë në Evropë kanë paralajmëruar se kontinenti po përballet me kërcënimin më serioz të sigurisë që nga Lufta e Ftohtë.

Sekretari i përgjithshëm i NATO-s ka deklaruar së fundmi se Rusia po intensifikon veprimet hibride dhe presionin ndaj shoqërive perëndimore, ndërsa disa vende kanë nisur të përgatisin popullsinë për skenarë të mundshëm konflikti afatgjatë. Ekspertë të sigurisë paralajmërojnë se një përplasje e drejtpërdrejtë mes Rusisë dhe NATO-s do të kishte pasoja shkatërrimtare për Evropën dhe më gjerë.

Megjithatë, analistët theksojnë se deklaratat e figurave mediatike pranë Kremlinit përdoren shpesh si presion psikologjik dhe pjesë e luftës informative, edhe pse ato kontribuojnë në rritjen e pasigurisë dhe ankthit publik. Situata mbetet e tensionuar, ndërsa vëmendja ndërkombëtare është përqendruar te lëvizjet e ardhshme të Moskës dhe përgjigjja e Perëndimit.