I dyshuari shihet duke u larguar në këmbë, i veshur me të zeza, pas sulmit ku u vranë dy persona dhe u plagosën nëntë të tjerë
Autoritetet amerikane kanë publikuar pamjet e para filmike të personit të dyshuar për sulmin me armë zjarri në Universitetin Brown, ku dy persona humbën jetën dhe nëntë të tjerë u plagosën. Videoja u bë publike nga Departamenti i Policisë së Providence disa orë pas ngjarjes dhe tregon të dyshuarin duke u larguar nga kampusi universitar, i veshur tërësisht me rroba të zeza.
Policia u ka bërë thirrje qytetarëve që të bashkëpunojnë dhe të raportojnë çdo informacion që mund të ndihmojë në identifikimin ose lokalizimin e tij. Njëkohësisht, FBI ka hapur një portal të posaçëm online ku qytetarët mund të dërgojnë foto apo video që lidhen me incidentin.
Sipas autoriteteve, deri tani nuk është gjetur asnjë armë zjarri, ndërsa kërkimet për autorin vijojnë. Ngjarja ndodhi pasditen e së shtunës në godinën Barus and Holley, ku ndodhen departamentet e inxhinierisë dhe fizikës dhe ku në atë kohë po zhvilloheshin disa provime akademike.
Universiteti dërgoi një alarm emergjence në orën 16:22, duke paralajmëruar për një autor aktiv dhe duke u kërkuar studentëve e stafit të mbyllnin dyert, të heshtnin telefonat dhe të qëndronin të fshehur. Në vendngjarje mbërritën forca të shumta policie dhe shërbime emergjence, ndërsa media lokale raportoi për gjurmë gjaku dhe veshje të hedhura në trotuare.
Në operacion janë përfshirë edhe agjentë të Byrosë për Alkoolin, Duhanin, Armët e Zjarrit dhe Eksplozivët, ndërsa drejtori i FBI-së ka konfirmuar se agjencia po ofron të gjitha kapacitetet e nevojshme për hetimin. Edhe presidenti amerikan Donald Trump është informuar për situatën dhe ka shprehur keqardhje për ngjarjen, duke deklaruar se mendimet dhe lutjet janë me viktimat.
Universiteti Brown, i vendosur në Providence pranë Bostonit, numëron rreth 11 mijë studentë, ndërsa hetimet për një nga sulmet më të rënda në një kampus universitar amerikan në vitet e fundit vijojnë.
About the Author
