Një video e publikuar nga Meghan Markle pranë urës Pont de l’Alma në Paris, vendi që të çon në tunelin ku humbi jetën Princesha Diana në vitin 1997, ka shkaktuar reagime të forta në rrjete sociale dhe tensione brenda familjes mbretërore britanike.
Në pamjet e postuara pas pjesëmarrjes së saj në sfilatën e Balenciaga Fashion Week më 4 tetor, Meghan shfaqte pamjen e qytetit nga sedilja e pasme e makinës dhe këpucët e saj me taka, ndërsa automjeti kalonte pikërisht mbi urën që lidhet me tunelin fatal ku vdiq Diana, nëna e Princit Harry. Komentuesit e quajtën videon të pandjeshme dhe të pamatur.
Sipas ekspertëve të oborrit mbretëror, Harry është i tmerruar dhe jashtëzakonisht i zemëruar, pasi videoja i rikujtoi periudhën më traumatike të jetës së tij. Edhe pse nuk ishte e qëllimshme, ishte një gabim i rëndë, tha analisti Richard Fitzwilliams. Ai shtoi se veprime të tilla kanë peshë të madhe, duke pasur parasysh statusin publik të Meghan dhe përpjekjet e tyre për të ruajtur imazhin.
Ngjarja vjen në një kohë kur Princi Harry po përpiqet të rindërtojë marrëdhëniet me familjen e tij mbretërore. Pas një takimi të fundit me Mbretin Charles, ai kishte deklaruar në maj: “Do të doja pajtim me familjen time. Nuk ka më kuptim të vazhdojmë me grindjet, jeta është e çmuar.”
Ekspertët besojnë se kjo situatë mund të prishë përpjekjet e fundit për afrimin me pallatin. Ndërkohë, në Kaliforni, ku çifti jeton me dy fëmijët e tyre, videoja ka shkaktuar gjithashtu tronditje dhe debat publik mbi ndjeshmërinë e Meghan ndaj kujtimit të Princeshës Diana.
Ndërsa shumë e akuzuan për mungesë empatie, disa mbrojtës të saj argumentuan se videoja ishte thjesht një pamje e Parisit, pa asnjë qëllim provokues.
Markle ndodhej në Paris për të mbështetur mikun e saj, Pierpaolo Piccioli, drejtorin e ri kreativ të Balenciaga dhe u pa teksa përshëndetej me Anna Wintour të Vogue, një shenjë e pranimit të saj të plotë në botën e modës edhe pse jo pa polemika.
About the Author
