Nuno Loureiro, ekspert i njohur i shkencave bërthamore, u qëllua disa herë në banesën e tij luksoze, hetimet vijojnë pa detaje zyrtare
Një ngjarje e rëndë ka tronditur komunitetin akademik amerikan pas vrasjes së një profesori të shquar të Institutit të Teknologjisë në Massachusetts. Nuno Loureiro, 47 vjeç, profesor i shkencave bërthamore dhe fizikës në MIT, u gjet i qëlluar për vdekje brenda shtëpisë së tij në Brookline, një zonë elitare rezidenciale pranë Bostonit.
Policia ndërhyri rreth orës 20:30 të mbrëmjes së së hënës, pas raportimeve për një person të qëlluar me armë zjarri në një banesë në Gibbs Street. Loureiro u transportua me urgjencë në spital, por ndërroi jetë të martën në mëngjes si pasojë e plagëve të marra.
Zyra e Prokurorit të Qarkut Norfolk konfirmoi se bëhet fjalë për një hetim aktiv për vrasje, ndërsa autoritetet kanë refuzuar të japin detaje të mëtejshme mbi rrethanat, autorin apo motivin e krimit. Sipas policisë lokale, viktima ishte qëlluar disa herë, por informacione të tjera nuk janë bërë publike.
Nuno Loureiro ishte me origjinë nga Portugalia dhe mbante një rol kyç në MIT, ku ishte drejtor i Qendrës së Shkencës së Plazmës dhe Fuzionit, një nga laboratorët më të mëdhenj të universitetit me mbi 250 studiues dhe punonjës të përhershëm. Ai konsiderohej një figurë e rëndësishme në fushën e energjisë së fuzionit dhe kërkimeve bërthamore.
Universiteti MIT shprehu ngushëllimet e tij për familjen, studentët dhe kolegët e profesorit, duke njoftuar se po ofrohet mbështetje psikologjike për komunitetin akademik. Institucioni theksoi se, për respekt të hetimeve në vijim, nuk do të komentojë më tej mbi ngjarjen.
Vrasja ndodh në një klimë të tensionuar sigurie, vetëm pak ditë pas një tjetër ngjarjeje të rëndë me armë zjarri në një universitet tjetër në rajon, duke rritur shqetësimet mbi sigurinë publike. Autoritetet vijojnë hetimet, ndërsa rasti mbetet i mbuluar nga heshtja zyrtare.
About the Author
