Moska e quan nismën e mbështetur nga Tramp si përshkallëzim lufte, ndërsa Ambasada amerikane në Kiev u kërkon qytetarëve të jenë gati për strehim urgjent
Rusia ka refuzuar zyrtarisht planin e fundit të paqes për Ukrainën të mbështetur nga presidenti amerikan Donald Tramp, duke rritur ndjeshëm tensionet në rajon dhe duke nxitur frikë për një përshkallëzim të ri ushtarak. Ministria e Jashtme ruse deklaroi se propozimi i përbashkët SHBA-BE nuk synon paqen, por përforcimin e konfliktit dhe militarizimin e mëtejshëm të Ukrainës.
Në një reagim të ashpër, Kremlini, i drejtuar nga Vladimir Putin, e cilësoi planin si krijim të një “boshti lufte”, duke kundërshtuar veçanërisht idenë e vendosjes së një force shumëkombëshe në territorin ukrainas pas armëpushimit. Sipas Moskës, kjo do të shërbente për rindërtimin dhe forcimin e ushtrisë ukrainase dhe jo për garantimin e paqes afatgjatë.
Refuzimi i Rusisë vjen në një moment kritik, pasi SHBA kanë dhënë sinjale për sanksione më të ashpra ndaj Moskës dhe vendeve që blejnë naftë ruse. Në të njëjtën kohë, Ambasada e Shteteve të Bashkuara në Kyiv ka lëshuar një paralajmërim urgjent për qytetarët amerikanë, duke i këshilluar të jenë të përgatitur për t’u strehuar menjëherë, pasi ekziston rreziku i një sulmi të madh ajror në ditët në vijim.
Paralajmërimi ka shtuar shqetësimet pas raportimeve për prani të armëve strategjike ruse pranë kufijve të Ukrainës dhe vazhdimit të sulmeve me raketa në disa qytete, përfshirë Kharkivin. Autoritetet ukrainase kanë forcuar masat e sigurisë, ndërsa komuniteti ndërkombëtar ndjek me ankth zhvillimet e reja.
Plani i paqes, i diskutuar më herët në Paris nga emisarë të Trumpit dhe liderë europianë, parashikonte garanci sigurie për Ukrainën, ndihmë afatgjatë ushtarake dhe sanksione të reja në rast të një agresioni të ardhshëm rus. Megjithatë, refuzimi i prerë i Moskës e ka vënë në pikëpyetje fatin e kësaj nisme dhe ka rikthyer frikën se konflikti mund të hyjë në një fazë edhe më të rrezikshme.
Ndërsa diplomacia duket e bllokuar, paralajmërimet për sulme ajrore dhe retorika gjithnjë e më e ashpër nga të dyja palët tregojnë se lufta në Ukrainë mbetet larg zgjidhjes dhe rreziku i përshkallëzimit mbetet real.
About the Author
