Kryeministri thotë se prioritet absolut do të jetë buxheti i vitit 2026 dhe se nuk priten ndryshime të mëdha në kabinet
Kryeministri i Kosovës, Albin Kurti, ka deklaruar se menjëherë pas certifikimit të rezultateve të zgjedhjeve nga Komisioni Qendror i Zgjedhjeve, synimi i qeverisë është konstituimi sa më i shpejtë i Kuvendit dhe formimi i ekzekutivit të ri.
Në një intervistë për media, Kurti tha se mbledhja e parë e qeverisë së re do të fokusohet kryesisht në miratimin e buxhetit për vitin 2026, duke e cilësuar atë si vendimin më të rëndësishëm që duhet marrë në fillim të mandatit.
Ai theksoi se procesi i formimit të qeverisë do të ecë paralelisht me konstituimin e legjislaturës së dhjetë të Kuvendit të Kosovës, përfshirë zgjedhjen e kryesisë, në mënyrë që institucionet të jenë funksionale sa më shpejt.
Sa i përket përbërjes së kabinetit qeveritar, Kurti u shpreh se nuk priten ndryshime të mëdha, por la të hapur mundësinë për rikonfigurime të pjesshme pas konsultimeve brenda Lëvizjes Vetëvendosje dhe me partnerët e koalicionit.
Ai nënvizoi se rezultati zgjedhor duhet analizuar në tërësi, duke marrë parasysh jo vetëm votën për subjektin politik, por edhe mbështetjen që kanë marrë kandidatët individualë. Sipas tij, në Kuvend do të ketë deputetë të rinj, deputetë të konfirmuar me më shumë vota, por edhe të tillë që kanë humbur mbështetje.
Kurti shtoi se vendimmarrja për kabinetin nuk do të bazohet vetëm në renditjen hierarkike apo numrin e votave, por në rolin që secili mund të luajë në funksion të ekipit qeverisës dhe bashkëpunimit mes mazhorancës parlamentare dhe qeverisë.
Ai përfundoi duke theksuar se ndërtimi i qeverisë së re do të jetë një proces kolektiv, me qëllim krijimin e një ekipi funksional që i përgjigjet sfidave të mandatit të ardhshëm.
About the Author
