Ekzekutivi miraton aderimin e Shqipërisë në nismën e iniciuar nga presidenti amerikan Donald Tramp, seanca parlamentare pritet javën e ardhshme
Qeveria shqiptare ka miratuar zyrtarisht vendimin për aderimin e Shqipërisë në të ashtuquajturin Bordi i Paqes, duke hedhur hapin e parë drejt anëtarësimit formal të vendit në këtë strukturë ndërkombëtare, pas ftesës së bërë nga presidenti i Shteteve të Bashkuara të Amerikës, Donald Tramp.
Pas vendimit të ekzekutivit, procedura kalon në Kuvendi i Shqipërisë, i cili do të ketë fjalën përfundimtare mbi miratimin ose jo të aderimit. Sipas burimeve zyrtare, çështja pritet të shqyrtohet dhe të hidhet në votim të martën e ardhshme, në një seancë të posaçme parlamentare.
Ftesa për Shqipërinë u bë disa ditë më parë nga presidenti Tramp, në kuadër të nismës për krijimin e Bordit të Paqes për Gazën, një strukturë që synon përfshirjen e disa shteteve në diskutime dhe vendimmarrje lidhur me proceset e paqes dhe stabilitetit në rajon.
Vendimi i qeverisë ka ngjallur interes të lartë dhe debat politik në vend. Pritet që në Kuvend diskutimet të shoqërohen me qëndrime të ndryshme nga mazhoranca dhe opozita, si për aspektet politike, ashtu edhe për implikimet diplomatike dhe kushtetuese të përfshirjes së Shqipërisë në këtë nismë ndërkombëtare.
About the Author
