Në përballjen gjyqësore mes Erion Veliajt dhe Qeverisë, përfaqësuesja e saj, avokatja Irma Qosja, kërkoi nga Gjykata Kushtetuese që të mos pranojë padinë e ish-kryebashkiakut, duke theksuar se vendimi për shkarkimin është marrë në përputhje me ligjin për vetëqeverisjen vendore.
Në seancën e sotme në Gjykatën Kushtetuese, përfaqësuesja e Qeverisë, avokatja e Shtetit Irma Qosja, paraqiti argumentet ligjore në mbrojtje të vendimit për shkarkimin e Erion Veliajt nga posti i kryetarit të Bashkisë së Tiranës. Ajo kërkoi rrëzimin e kërkesës së paraqitur nga Veliaj, duke theksuar se vendimi është marrë në përputhje të plotë me ligjin dhe se Gjykata Kushtetuese nuk ka kompetencë për ta shqyrtuar këtë rast.
Sipas Qoses, procedura e ndjekur nga Këshilli i Ministrave ka respektuar nenin 62 të ligjit për vetëqeverisjen vendore, që parashikon shkarkimin e një kryebashkiaku në rast mungese të zgjatur dhe të pajustifikuar në detyrë. Ajo sqaroi se në këtë rast nuk bëhet fjalë për shkelje të Kushtetutës, siç pretendon Veliaj, por për një çështje që hyn në kuadrin e ligjit administrativ.
“Ankimuesi pretendon se është shkarkuar në kundërshtim me Kushtetutën, por në fakt vendimi është marrë në bazë të ligjit për vetëqeverisjen vendore. Shkarkimi i tij nuk është pasojë e një rrethane kushtetuese, por e një situate ligjore që lidhet me mungesën në detyrë,” u shpreh Qosja para trupës gjykuese.
Ajo shtoi se të gjitha provat dhe dokumentet që shoqërojnë vendimin janë dorëzuar në mënyrë të rregullt dhe të plotë, ndërsa procedura e ndjekur nga Këshilli i Ministrave është në përputhje me çdo kërkesë ligjore.
Në përfundim të fjalës së saj, avokatja e Shtetit kërkoi që kërkesa e Erion Veliajt të rrëzohet si e pabazuar dhe jashtë kompetencës së Gjykatës Kushtetuese, duke theksuar se asnjë element i padisë nuk përmbush kriteret për shqyrtim në këtë nivel.
About the Author
