Këshilli Gjyqësor i jep fund karrierës së gjyqtarit të Apelit, i akuzuar se mbante dosjet e Sasho Mijallkov në sirtar deri në parashkrim, tashmë në “listën e zezë” të SHBA.
Këshilli Gjyqësor ka marrë një vendim tronditës për drejtësinë maqedonase duke shkarkuar nga detyra gjyqtarin e Apelit, Enver Bexheti. Vendimi erdhi pas akuzave të rënda për abuzim me detyrën, fshehje dosjesh dhe korrupsion të lidhur me ish-shefin e shërbimeve sekrete, Sasho Mijallkov.
Hetimet zbuluan se Bexheti i mbante në sirtar dosjet që lidhnin Mijallkovin me korrupsionin, derisa këto çështje të parashkruheshin, duke i shpëtuar kështu dënimit. Këshilli Gjyqësor theksoi se veprimet e tij përbënin “shkelje të rëndë disiplinore” dhe dëmtuan rëndë imazhin e gjyqësorit.
Skandali është thelluar edhe më tej pasi Bexheti është përfshirë në listën e zezë të SHBA, ku akuzohet për korrupsion të konsiderueshëm dhe përfitime të paligjshme në shkëmbim të favoreve gjyqësore.
Pas publikimit të emrit të tij, Prokuroria ka hapur një parahetim për rastin, ndërsa vetë Bexheti, në mbrojtjen e tij, ka mohuar akuzat duke pretenduar se “lista e zezë” nuk ka fuqi detyruese dhe se vonesat në dosje ishin pasojë e kushteve të punës gjatë pandemisë.
Megjithatë, vendimi i Këshillit shënon një precedent të fortë: një nga gjyqtarët më të fuqishëm të vendit rrëzohet nga posti, duke ekspozuar edhe një herë lidhjet e errëta mes drejtësisë dhe korrupsionit politik.
About the Author
