Tankeri Bella 1, tashmë i quajtur Marinera, shndërrohet në pikë përplasjeje mes Moskës dhe Uashingtonit, rriten frikërat për konflikt të hapur
Tensionet mes Rusisë dhe Shteteve të Bashkuara kanë hyrë në një fazë të re përshkallëzimi, pasi Moska ka dislokuar anije luftarake në Oqeanin Atlantik për të shoqëruar dhe mbrojtur një cisternë nafte që po ndiqet nga forcat amerikane.
Bëhet fjalë për anijen e njohur më parë si Bella 1, e cila tashmë lundron me emrin Marinera dhe nën flamurin rus, pasi ka ndryshuar regjistrimin nga Guyana. Sipas raportimeve, cisterna ndodhej mes Skocisë dhe Islandës, ndërsa po monitorohej nga afër nga mjetet detare dhe ajrore të SHBA.
Anija ka qenë nën vëzhgim që prej muajit të kaluar, kur Roja Bregdetare amerikane tentoi ta ndalonte në Karaibe, pasi kishte siguruar një urdhër për shkelje të dyshuara të sanksioneve dhe për transport të mëparshëm të naftës nga Venezuela dhe Irani. Operacioni dështoi, pasi cisterna ndryshoi papritur kurs, emër dhe flamur.
Lëvizja e saj drejt Europës është shoqëruar me një mobilizim të shtuar amerikan, ku raportohet se rreth dhjetë avionë transporti dhe helikopterë janë angazhuar për ta ndjekur dhe monitoruar. Nga ana tjetër, Rusia ka reaguar duke dërguar anije luftarake si eskortë, duke e kthyer situatën në një përballje të drejtpërdrejtë detare.
Ministria e Jashtme ruse ka deklaruar se cisterna po lundron në ujëra ndërkombëtare në përputhje të plotë me të drejtën detare dhe ka kërkuar nga SHBA dhe NATO të respektojnë parimin e lirisë së lundrimit. Uashingtoni, ndërkohë, ka bërë të ditur se forcat e tij janë në gatishmëri për të vepruar nëse situata e kërkon.
Analistët paralajmërojnë se çdo incident i pakontrolluar në Atlantik mund të ketë pasoja të rënda gjeopolitike, duke e kthyer një ndalim anijeje në një krizë të hapur mes dy fuqive bërthamore. Situata po ndiqet minutë pas minute, ndërsa frika për një përplasje të drejtpërdrejtë vazhdon të rritet.
About the Author
