E njohur për rolin e saj në filmin Anna të vitit 1987, Kirkland u shua në kujdesin paliativ pas një viti të vështirë me probleme shëndetësore dhe demencë.
Aktorja amerikane Sally Kirkland, e cila u nominua për çmimin Oscar dhe fitoi Golden Globe për interpretimin e saj në filmin Anna në vitin 1987, ka ndërruar jetë në moshën 84-vjeçare. Lajmi u konfirmua nga përfaqësuesi i saj, Michael Greene, i cili tha se Kirkland u shua të martën në mëngjes në një qendër kujdesi paliativ në Palm Springs.
Gjatë vitit të fundit, aktorja ishte përballur me probleme serioze shëndetësore, mes tyre një diagnozë të demencës dhe disa fraktura të rënda që i kërkuan trajtim të gjatë. Sipas një nisme bamirësie të hapur më herët për të, Kirkland kishte pësuar dy infeksione të rrezikshme gjatë periudhës së rikuperimit dhe kishte kaluar muaj të tërë në spitale dhe qendra rehabilitimi, përtej asaj që siguracioni i saj mbulonte.
Miqtë dhe njohës të saj e përshkruajnë Sally-n si një figurë të ngrohtë, gjithmonë pranë të tjerëve, pavarësisht se vetë nuk kishte familje mbi të cilën të mbështetej në kohë të vështira. Ajo e kishte kaluar jetën e saj duke iu përkushtuar artit, komunitetit dhe besimit.
Gjatë karrierës së saj, Kirkland mori pjesë në më shumë se 200 filma dhe projekte televizive, mes tyre JFK, Charlie’s Angels dhe Bruce Almighty. Roli i saj në Anna u konsiderua kulmi i karrierës, duke i sjellë vlerësime ndërkombëtare dhe njohje kritike.
Në një intervistë të vitit 2006, ajo thoshte se ndihej me fat që kishte realizuar shumë nga ëndrrat e saj artistike dhe se puna i kishte dhënë kuptim jetës.
Sally Kirkland largohet duke lënë pas një trashëgimi të gjerë arti, një karrierë të gjatë dhe një kujtim të qëndrueshëm për shpirtin e saj të butë dhe të pathyeshëm.
About the Author
