Me rreth 500 mijë të rinj të izoluar vetëm në kryeqytet dhe norma vetëvrasjesh ndër më të lartat në OECD, autoritetet nisin programet e reja të mbështetjes psikologjike dhe sociale
Korea e Jugut po përballet me një rritje alarmante të vetmisë dhe izolimit social, veçanërisht tek të rinjtë. Statistikat tregojnë se në vitin 2024 mbi 21 për qind e qytetarëve deklaruan se ndiheshin të vetmuar, ndërsa rreth 500 mijë të rinj të moshës 19 deri 34 vjeç jetojnë të shkëputur nga shoqëria vetëm në Seul. Kjo situatë, e cilësuar si epidemi e heshtur, lidhet me presionin e madh akademik, konkurrencën ekstreme, pamundësinë për punësim të qëndrueshëm dhe largimin nga familja.
Për të frenuar fenomenin, qeveria metropolitane e Seulit ka hapur katër hapësira të reja sociale të quajtura maeum pyeonuijeom, të njohura si “supërmarketet e zemrës”, ku qytetarët mund të takohen, të bisedojnë, të marrin mbështetje psikologjike ose thjesht të kalojnë kohë me të tjerë. Qendrat ofrojnë një ambient të ngrohtë me bibliotekë, kënd gatimi me kafe e ushqim të shpejtë, kënd relaksi me masazh dhe sauna të vogël, ndërsa dy herë në javë organizohen shfaqje filmash dhe diskutime për të nxitur komunikimin.
Vetmia në vend është e lidhur ngushtë edhe me shëndetin mendor. Korea e Jugut ka një ndër normat më të larta të vetëvrasjeve në botë, me rreth 29 raste për 100 mijë banorë, shumë më lart se mesatarja evropiane. Shumë të rinj jetojnë në goshiwon, dhoma të vogla dhe shpesh pa dritare, ku izolimi i gjatë ndikon rëndë në shëndetin psikologjik.
Përveç qendrave sociale, qyteti ka hapur edhe një linjë telefonike 24 orë për mbështetje emocionale. Fillimisht e parashikuar për 3 mijë telefonata në vit, linja mori 24 mijë thirrje vetëm në një muaj e gjysmë, duke treguar madhësinë reale të problemit. Ndërkohë, po krijohen edhe grupe ecjeje pa detyrim bisede, që i ndihmojnë qytetarët të lidhen në mënyrë të natyrshme dhe të shërojnë izolimin.
Programet e reja synojnë rikthimin e ndërveprimit njerëzor në një shoqëri ku ritmi i lartë i jetës, teknologjia dhe presioni akademik-konkurrues kanë larguar individët nga njëri-tjetri. Zyrtarët deklarojnë se projekti do të zgjerohet nëse rezultatet vazhdojnë të jenë pozitive.
About the Author
