Presidenti amerikan deklaron se SHBA është në gatishmëri të plotë dhe do të reagojë nëse Teherani ushtron dhunë ndaj protestave për koston e jetesës
Presidenti i Shteteve të Bashkuara, Donald Tramp, ka lëshuar një paralajmërim të fortë ndaj Iran, duke deklaruar se Uashingtoni është gati të ndërhyjë nëse autoritetet iraniane vrasin protestuesit që kanë dalë në rrugë kundër rritjes së kostos së jetesës.
Përmes një postimi në platformën e tij Truth Social, Tramp tha se Shtetet e Bashkuara janë në gatishmëri të plotë dhe të gatshme për veprim, në rast se dhuna ndaj protestuesve paqësorë përshkallëzohet. Ai akuzoi Teheranin se ka një histori të përdorimit të forcës ndaj qytetarëve që protestojnë.
Në deklaratën e tij, Tramp shkroi se nëse Irani qëllon dhe vret protestues paqësorë, atëherë SHBA do të vijë në ndihmë të tyre. Sipas tij, Uashingtoni nuk do të qëndrojë pasiv përballë asaj që e cilësoi si dhunë sistematike ndaj qytetarëve.
Paralajmërimi i presidentit amerikan vjen pas përleshjeve të fundit mes protestuesve dhe forcave të sigurisë në disa qytete iraniane, ku raportimet flasin për të paktën gjashtë persona të vrarë. Protestat shpërthyen fillimisht në Teheran, ku qytetarët dhe tregtarët dolën në rrugë për të kundërshtuar çmimet e larta dhe stagnimin ekonomik, ndërsa disa dyqane shpallën grevë.
Deklaratat e Tramp pritet të rrisin tensionet mes Uashingtonit dhe Teheranit, në një moment kur situata e brendshme në Iran mbetet e brishtë dhe nën vëzhgim të vazhdueshëm ndërkombëtar.
About the Author
