Një krater rreth 15 metra i thellë u hap papritur në Kajro, duke plagosur persona dhe duke shkaktuar panik mes qytetarëve
Një ngjarje e frikshme është regjistruar në Kajro, ku toka u shemb papritur duke përpirë tërësisht një pikë karburanti dhe dy dyqane pranë saj. Pamjet e kamerave të sigurisë tregojnë momentin dramatik kur rruga fillon të fundoset ngadalë dhe më pas hapet në një gropë gjigante, duke krijuar një krater rreth 15 metra të thellë.
Në video shihen persona që ndodheshin pranë zonës duke vrapuar në panik për t’i shpëtuar shembjes, ndërsa një automjet largohet me shpejtësi nga vendngjarja. Brenda ambienteve ndodheshin të paktën dy persona në momentin kur toka u ça, të cilët mbetën të plagosur dhe u transportuan me urgjencë në spital.
Sipas mediave egjiptiane, të lënduarit kanë pësuar fraktura dhe dëmtime serioze, por gjendja e tyre shëndetësore raportohet e stabilizuar. Zona u mbulua nga një re e madhe pluhuri, ndërsa ndërtesat u zhdukën brenda pak sekondash.
Hetimet paraprake tregojnë se shembja mund të jetë shkaktuar nga punime ndërtimore pranë zonës, të cilat dyshohet se kanë destabilizuar nëntokën. Policia dhe autoritetet lokale rrethuan menjëherë vendin e ngjarjes dhe nisën inspektimet teknike për të garantuar sigurinë e objekteve përreth.
Ky është rasti i dytë i një grope të tillë në Kajro brenda më pak se dy muajsh, duke rritur shqetësimin mes banorëve për sigurinë e infrastrukturës urbane. Autoritetet kanë nisur hetime të thelluara për të përcaktuar shkaqet dhe përgjegjësit e kësaj ngjarjeje të rëndë.
About the Author
