Ngjarja e rëndë në Devoll, ku një 32-vjeçar u rrëmbye dhe u dhunua për disa orë, ka tronditur strukturat e Policisë së Shtetit, duke sjellë shkarkime dhe hetime disiplinore në të gjithë zinxhirin drejtues të Drejtorisë Vendore të Policisë Korçë.
Një ngjarje e ndodhur në Devoll ka ndezur reagime të forta dhe ka sjellë pasoja të menjëhershme në radhët e policisë. Pas rrëmbimit dhe dhunimit të 32-vjeçarit Ilir Topçiu, ku ndër të përfshirët rezulton të jetë edhe vëllai i deputetit të Partisë Demokratike, Bledion Nallbati, strukturat e rendit janë vënë nën lupën e Drejtorisë së Përgjithshme të Policisë së Shtetit.
Nga analizat e brendshme rezultoi se zinxhiri drejtues i Drejtorisë Vendore të Policisë Korçë nuk kishte përmbushur detyrimet ligjore dhe kishte dështuar në menaxhimin e situatës, duke dëmtuar rëndë imazhin e institucionit në sytë e komunitetit.
Si rezultat, Drejtori i Përgjithshëm i Policisë së Shtetit, Ilir Proda, firmosi shkarkimin nga detyra të drejtorit të Policisë së Korçës, Erion Ahmeti, si dhe pezullimin e zëvendësdrejtorit për Hetimin e Krimit, Hajri Kushe, deri në përfundim të hetimit disiplinor.
Ndërkohë, Drejtoria e Standardeve Profesionale ka nisur hetim disiplinor për gjithë zinxhirin drejtues të DVP Korçë dhe Komisariatit të Devollit, për mospërmbushje të detyrave dhe reagim të vonuar ndaj një ngjarjeje me pasoja të rënda kriminale.
Në vend të Erion Ahmetit, përkohësisht është emëruar Islor Islami, ish-drejtor i Drejtorisë Vendore për Kufirin dhe Migracionin në Kukës, i cili do të mbajë postin deri në përfundimin e konkursit për drejtues të ri.
Në reagimin zyrtar, Policia e Shtetit theksoi se do të marrë çdo masë ndëshkimore në përputhje me ligjin për punonjësit që nuk reagojnë me profesionalizëm dhe përgjegjësi, duke u përpjekur të rikthejë besimin e qytetarëve pas një episodi që vuri në pikëpyetje efikasitetin e strukturave vendore të rendit.
Ngjarja e Devollit, ku një qytetar u rrëmbye dhe u dhunua për disa orë për motive të dobëta, ka tronditur opinionin publik dhe ka rikthyer vëmendjen tek lidhjet e errëta mes politikës dhe grupeve që veprojnë në hije, duke e kthyer këtë rast në një provë të fortë për seriozitetin e reformës në rend dhe siguri.
About the Author
