PS largohet nga salla pas debateve, PD ironizon socialistët dhe akuzon për vendime të diktuara jashtë Kuvendit
Mbledhja e Sekretariatit të Etikës, ku po shqyrtohej kërkesa e mazhorancës për përjashtimin e 29 deputetëve të opozitës, u mbyll pas vetëm pak minutash dhe u shoqërua me përplasje të forta politike. Pas debateve, përfaqësuesit e Partisë Socialiste u larguan nga salla, duke u tërhequr për të marrë vendimin, ndërsa opozita reagoi me ironi dhe akuza të drejtpërdrejta.
Sipas socialistëve, shkak për ndërprerjen e mbledhjes u bë transmetimi live që deputetët e PD-së realizuan në Facebook, veprim që, sipas tyre, shkel nenin 8 të rregullores. Këtë qëndrim e artikuloi edhe Ulsi Manja, duke akuzuar opozitën për shkelje proceduriale.
Reagimi i demokratëve ishte i menjëhershëm dhe i ashpër. Flamur Noka ironizoi largimin e mazhorancës duke deklaruar se vendimet nuk po merren në Kuvend, por diku tjetër. Ai u shpreh se socialistët duhet të shkonin te zyra e Gysit për të zhvilluar mbledhjen dhe për të marrë vendimet atje.
Ironia u thellua edhe më tej nga Albana Vokshi, e cila shtoi se socialistët mund të pinin edhe verën e Gysit, duke nënkuptuar se vendimmarrja po bëhet jashtë institucioneve zyrtare. Debati vijoi me replika të shumta, akuza për pezullim të opozitës dhe pretendime se përjashtimet po përdoren si mjet politik.
Përplasja në Sekretariatin e Etikës vjen në një klimë të tensionuar parlamentare, ku përjashtimi i deputetëve opozitarë po shihet nga PD si një precedent i rrezikshëm dhe një tentativë për të mbytur zërin kundërshtar në Kuvend. Vendimi përfundimtar pritet të merret jashtë sallës, ndërsa tensionet politike vetëm sa janë thelluar.
About the Author
