Autoritetet arrestojnë një student të dyshuar për lidhje me ISIS dhe përgatitje të një atentati me eksplozivë
Shërbimet e sigurisë në Poloni kanë parandaluar një atentat të rëndë terrorist që synonte një treg Krishtlindjesh, duke arrestuar një student të dyshuar për lidhje me organizatën terroriste ISIS. Lajmi u konfirmua nga autoritetet polake, të cilat thanë se ndërhyrja u bë përpara se plani të kalonte në fazën e ekzekutimit.
Sipas shërbimeve speciale, i dyshuari është Mateusz W., student në Universitetin Katolik të Lublinit, i cili dyshohet se po përgatiste një sulm me eksplozivë me synimin për të shkaktuar viktima të shumta dhe për të mbështetur ideologjikisht Shtetin Islamik. Prokuroria njoftoi se ai akuzohet për ndërmarrje të veprimeve përgatitore për një akt terrorist që mund të kishte pasoja fatale për shumë persona.
Zyrtarët e sigurisë deklaruan se gjatë hetimeve janë sekuestruar pajisje elektronike dhe materiale të lidhura me radikalizimin fetar, ndërsa i riu dyshohet se kishte tentuar të vendoste kontakte direkte me një organizatë terroriste për të siguruar mbështetje në realizimin e sulmit.
I dyshuari u arrestua në banesën e tij në qytetin Lublin, në lindje të Polonisë, që në muajin nëntor, por autoritetet kanë zgjedhur të mos bëjnë publik emrin e qytetit ku planifikohej atentati, për të shmangur panikun mes qytetarëve. Gjykata ka vendosur masën e ndalimit për një periudhë fillestare prej tre muajsh.
Autoritetet polake kanë theksuar se ky rast nuk është i izoluar. Më herët gjatë vitit, tre të rinj 19-vjeçarë u akuzuan për grumbullim materialesh shpërthyese dhe plane për sulme terroriste, përfshirë edhe një objekt shkollor në veri të vendit.
Zyrtarë të sigurisë kanë bërë thirrje për vigjilencë të shtuar, veçanërisht gjatë periudhës së festave, duke kujtuar atentatet e ndodhura vitet e fundit në Evropë dhe ngjarjen e rëndë të fundit në Australi. Sipas tyre, parandalimi i këtij rasti tregon rëndësinë e ndërhyrjes së hershme dhe monitorimit të radikalizimit, për të shmangur pasoja tragjike për qytetarët.
About the Author
