Ngjarja ndodhi pranë zonës “Delijorgji”, ku pronari dhe punonjësi u dëmtuan rëndë nga shpërthimi, ndërsa hetimet vijojnë për të zbardhur shkakun.
Një shpërthim i rëndë i bombulës së gazit ka tronditur paraditen e së enjtes kryeqytetin, në një ambient lokali pranë zonës së “Delijorgji” në Tiranë. Si pasojë janë plagosur pronari i picerisë, Besmir Dyrmishi, 40 vjeç, dhe punonjësi i tij, Klejdi Bajrami, 28 vjeç. Të dy janë transportuar me urgjencë për mjekim, ndërsa gjendja e tyre raportohet e stabilizuar.
Pamjet nga vendi i ngjarjes tregojnë xhama të copëtuar, orendi të shkatërruara dhe dëme të konsiderueshme materiale brenda lokalit. Dëshmitarë në zonë flasin për një shpërthim të papritur që shkaktoi panik dhe tronditi banorët përreth.
Në vendndodhje ka mbërritur grupi hetimor, i cili ka nisur verifikimet për shkakun e incidentit. Paraprakisht dyshohet se shpërthimi mund të ketë ardhur nga një defekt në bombulën e gazit, por pista të tjera nuk përjashtohen deri në përfundimin e hetimeve.
Ngjarja ka ngjallur shqetësim për masat e sigurisë në bizneset që përdorin bombola gazi, ndërsa pritet që ekspertiza teknike të përcaktojë saktësisht mekanizmin e shpërthimit.
About the Author
