Ngjarja ndodhi në orët e para të mëngjesit në bulevardin Nënë Tereza; dëmet janë vetëm materiale ndërsa autorët mbeten të paidentifikuar.
Një sasi eksplozivi ka tronditur Kamzën në mesnatë, duke shpërthyer në pjesën e jashtme të një biznesi të vendosur në bulevardin Nënë Tereza. Shpërthimi ka ndodhur rreth orës 02:20 dhe ka shkaktuar panik te banorët përreth, por fatmirësisht nuk raportohet për të lënduar. Dëmet janë kufizuar vetëm në fasadën e objektit në pronësi të shtetasve B. E. dhe K. M.
Forcat e policisë dhe grupi hetimor mbërritën menjëherë në vendngjarje, ku nisën këqyrjen e provave dhe mbledhjen e kamerave të sigurisë së zonës. Paraprakisht dyshohet se lënda e përdorur ka qenë tritol i vendosur me qëllim dëmtimi, ndërsa autorët e sulmit janë ende të paidentifikuar.
Hetimet po vijojnë në disa pista, ndërsa policia po punon për të zbuluar nëse ngjarja lidhet me konflikte të mëparshme, presion financiar apo ndonjë përplasje biznesi. Banorët e zonës kanë treguar se shpërthimi ka qenë tejet i fortë, duke u dëgjuar në një perimetër të gjerë.
Ndërkohë, autoritetet u bëjnë thirrje qytetarëve që të bashkëpunojnë dhe të raportojnë çdo informacion që mund të ndihmojë në identifikimin e personave të përfshirë në ngjarje.
About the Author
