Lënda plasëse u vendos nga një person i maskuar në pjesën e pasme të lokalit; pronarët thonë se nuk kanë konflikte dhe presin zbardhjen e plotë të ngjarjes.
Një incident me lëndë plasëse ka goditur restorantin Perla e Detit në Vlorë gjatë orëve të para të mëngjesit. Sipas të dhënave paraprake, shpërthimi është shkaktuar në pjesën e pasme të lokalit, në pronësi të Klodjan Muratit dhe Benard Elezit. Fatmirësisht, sasia e eksplozivit ka qenë e vogël, duke shkaktuar vetëm thyerjen e disa xhamave të fasadës.
Pamjet e kamerave të sigurisë tregojnë një person të maskuar që afrohet pranë ndërtesës, vendos lëndën plasëse dhe largohet me vrap në këmbë menjëherë pas veprimit. Identiteti i autorit ende nuk është përcaktuar, ndërsa policia ka nisur mbledhjen e provave në terren dhe sekuestrimin e pamjeve të tjera të mundshme.
Pronarët e restorantit kanë deklaruar se nuk kanë konflikte me askënd dhe nuk kanë asnjë ide për motivet e vendosjes së lëndës plasëse. Ata shprehën gatishmërinë për të bashkëpunuar me hetuesit deri në zbardhjen e plotë të ngjarjes.
Autoritetet po hetojnë disa pista, duke përfshirë mundësinë e një akti të synuar frikësimi. Hetimet janë në vazhdim.
About the Author
