Sindroma e të vjellave të tepërta të shkaktuara nga kanabisi po shfaqet gjithnjë e më shpesh tek përdoruesit e rregullt të marijuanës; raste me javë të tëra të vjellash, pamundësi ushqyerje dhe rënie drastike në peshë.
Një numër në rritje rastesh në spitalet e SHBA po lidhin përdorimin e përditshëm të kanabisit me një gjendje të rëndë shëndetësore të quajtur Cannabis Hyperemesis Syndrome (CHS), e cila shkakton të vjella të forta, dhimbje barku, nauze dhe humbje të ndjeshme në peshë. Fenomeni i njohur si scromiting, kombinim mes të vjellave dhe ulërimave nga dhimbja, është kthyer në makth për mijëra pacientë të rinj.
Një prej tyre, Sydni Collins, sot 23 vjeç, përdorte kanabis pothuajse çdo ditë që prej adoleshencës. Episodet e para të sëmundjes përfshinin të vjella që zgjatnin me orë, humbje totale oreksi dhe pamundësi për të ngrënë normalisht. Gjatë një periudhe akute, ajo ra në vetëm 87 paund dhe përfundoi në spital me tub ushqyes, pas shtatë vizitave urgjente brenda një muaji.
Mjekët shpesh e ngatërrojnë CHS me çrregullime të tjera gastrointestinale, duke e diagnostikuar gabim si grip stomaku, refluks apo probleme të tjera të zorrëve. Vetëm kohët e fundit OBSH dhe CDC kanë futur kode zyrtare diagnostike, ndërsa urgjencat raportojnë rritje të vazhdueshme në dekadën e fundit.
Rastet e raportuara tregojnë se përdoruesit kronikë përjetojnë të vjella të pandalshme, temperaturë, dehidrim dhe shpesh kërkojnë banja të nxehta për të lehtësuar simptomat, megjithëse kjo përkeqëson gjendjen. Disa pacientë kthehen te kanabisi për të ulur dhimbjen, duke hyrë në një cikël që i rëndon më shumë.
Ekspertët thonë se stimujt e vazhdueshëm të receptorëve kanabinoidë mund të çojnë në çrregullime të sistemit që kontrollon të vjellat dhe stomakun. CHS rrezikon sidomos përdoruesit ditorë, veçanërisht ata që konsumojnë koncentrate me përqendrim të lartë THC.
Për shumë pacientë, përveç vuajtjes fizike, goditja psikologjike është po aq e rëndë. Të rinjtë raportojnë izolim, ankth dhe pamundësi për të punuar apo ndjekur shkollën. Collins tregoi se pas 10 ditësh të vjellash pa pushim, humbi vullnetin për të vazhduar dhe kërkoi ndihmë.
Sipas saj, përmirësimi real ndodhi vetëm kur ndërpreu plotësisht përdorimin e kanabisit. Pas lënies, simptomat u qetësuan gradualisht dhe pesha filloi të rikuperohej. Sot ajo ndan përvojën e saj online për të ndihmuar të tjerët që përballen me CHS.
Numri i adoleshentëve përdorues të kanabisit në SHBA në 2023 i kaloi 2.5 milionë, ndërsa mbi 600 mijë konsiderohen të varur, çka e bën këtë sindromë një shqetësim të ri serioz për shëndetin publik.
About the Author
