Biografi mbretëror zbulon detaje tronditëse në librin e ri “Entitled: The Rise and Fall of the House of York”, ku përshkruhet rënia morale dhe publike e ish-Dukës së Jorkut
Një tjetër skandal trondit familjen mbretërore britanike, pasi një modele 20-vjeçare ka akuzuar Andrew Mountbatten-Windsor, ish-Dukën e Jorkut, se e kishte ftuar të përfshihej në aktivitet seksual të çrregullt për të përmbushur fantazitë e tij më të egra.
Sipas biografit mbretëror Andrew Lownie, i cili ka publikuar librin “Entitled: The Rise and Fall of the House of York”, ngjarja daton në fund të viteve ’80, kur modelja e kishte takuar Andrewn në një event bamirësie. Ajo rrëfen se princi i kishte thënë se kishte një martesë të hapur dhe se nuk kishte kufij moralë. Pas dy takimesh intime, ajo e kuptoi se ishte përdorur dhe nuk dëgjoi më për të.
Lownie, i cili e përshkruan këtë si një periudhë të errët të jetës së Andrewt, tregon se sjellja e tij ishte e njohur mes punonjësve të pallatit, të cilët paralajmëroheshin të mos i afroheshin. Një ish-dado ka rrëfyer se ishte detyruar të largohej për shkak të ngacmimeve të tij, ndërsa një masazhiste ka pohuar se ai shpesh insistonte të ishte nudo gjatë seancave dhe bënte komente me përmbajtje vulgare.
Në libër përmenden edhe episode të tjera skandaloze, përfshirë një udhëtim në Tajlandë gjatë të cilit Andrew, atëherë në moshën 41-vjeçare, thuhet se kishte porositur 40 prostituta gjatë një vizite zyrtare katërditore në një hotel luksoz, me shpenzimet e mbuluara nga taksapaguesit britanikë.
Pas këtyre zbulimeve, Mbreti Charles ka nisur një proces zyrtar për t’i hequr Andrewt çdo titull fisnikërie dhe nderimi mbretëror, ndërsa atij i është kërkuar të largohet nga rezidenca e tij në Royal Lodge, Windsor.
Buckingham Palace deklaroi se këto masa janë të nevojshme pavarësisht mohimeve të tij, dhe solidariteti i Familjes Mbretërore mbetet me viktimat e çdo forme abuzimi.
Skandali e ka zhytur Andrewn në izolim publik dhe moral, ndërsa dy vajzat e tij, Beatrice dhe Eugenie, pritet të ruajnë titujt mbretërorë, por sipas ekspertëve, do të përpiqen të distancohen nga babai i tyre që ka humbur përfundimisht statusin dhe respektin publik.
About the Author
