Familja padit kompaninë pas vdekjes së 35-vjeçarit në anije, avokati pretendon se ekuipazhi vazhdoi lundrimin me trupin në frigorifer
Një pasagjer i një kroçere të Royal Caribbean ka ndërruar jetë pas konsumimit të rreth 33 pijeve alkoolike, ndërsa sipas avokatit të familjes, trupi i tij është futur në frigorifer dhe udhëtimi ka vijuar normalisht për disa ditë. Viktima, Michael Virgil, 35 vjeç nga Kalifornia, ndodhej në udhëtim tre-ditor nga Los Angeles drejt Ensenada në Meksikë së bashku me partneren dhe djalin e tyre 7-vjeçar.
Padia për vdekje nga pakujdesia u depozitua nga e fejuara e tij, Connie Aguilar, e cila pretendon se Virgilit iu shërbyen një numër i tepruar pijesh në bordin e anijes dhe se më pas u bë agresiv, duke humbur orientimin dhe duke kërcënuar ekuipazhin e pasagjerët. Sipas aktpadisë, roja e sigurisë e ndaloi atë me forcë, e spërkati me spray irritues, qëndroi me peshën mbi trupin e tij dhe më pas e injektoi me një qetësues. Ekspertiza mjeko-ligjore raportoi se niveli i alkoolit në gjak ishte rreth dyfish i limitit të lejuar për drejtim automjeti.
Raporti mjekësor konstaton se Virgil u mbajt i shtypur për rreth tre minuta para se të dërgohej në qendrën mjekësore të anijes, ku humbi jetën. Shkaku i vdekjes u listua si dështim respirator dhe arrest kardiopulmonar i shkaktuar nga asfiksia mekanike dhe hipoksia. Avokati i familjes ka krahasuar rastin me vdekjen e George Floyd, duke thënë se viktima nuk ka mundur të marrë frymë gjatë momentit të frenimit fizik nga disa punonjës të anijes.
Aguilar ka deklaruar se kërkoi që kroçera të kthehej në port pas incidentit, por kompania nuk pranoi. Royal Caribbean ende nuk ka reaguar zyrtarisht mbi këto pretendime, ndërsa çështja pritet të shqyrtohet në gjykatë.
About the Author
