Pezullimi i volejbollistes braziliane ndez një debat të gjerë për etikën sportive, të drejtat e njeriut dhe mënyrën se si trajtohen sportistet në Shqipëri.
Kriza mes klubit Dinamo dhe Federatës Shqiptare të Volejbollit po thellohet pas pezullimit të volejbollistes braziliane Nayara Ferreira, e cila ka refuzuar t’i nënshtrohet një testi gjinie të kërkuar nga federata pas ankesave të disa klubeve rivale.
Në një deklaratë publike, Klubi Dinamo e cilëson vendimin e federatës të paprecedentë dhe pa bazë ligjore, duke theksuar se nuk është paraqitur asnjë provë apo procedurë e qartë që ta justifikojë një kërkesë kaq të ndjeshme. “Lojtarja është sportiste me licencë zyrtare të FIVB dhe një karrierë 15-vjeçare ndërkombëtare. Kërkesa për një test që cenon dinjitetin dhe integritetin personal të një atleteje është e pajustifikueshme,” thuhet në reagimin e klubit.
Burime pranë Dinamos sqarojnë se pezullimi i Ferreiras është marrë pa konsultim paraprak me klubin dhe se kjo ka ndikuar ndjeshëm në gjendjen emocionale të sportistes, e cila është ndier e fyer dhe e diskriminuar. Madje, sipas mediave, ajo ka kërkuar mbështetje nga Ambasada e Brazilit në Tiranë për të denoncuar trajtimin që i është bërë.
Nga ana tjetër, hetimet e nisura nga Federata erdhën pas ankesave të tri klubeve të kampionatit, Vllaznia, Pogradeci dhe Partizani, që ngritën dyshime mbi karakteristikat fizike dhe performancën e pazakontë të volejbollistes. Këto dyshime çuan në ngritjen e një grupi pune me përfaqësues të FSHV, Agjencisë së Sporteve dhe mjekut të Dinamos, të cilët kërkuan zyrtarisht testimin e sportistes.
Ferreira, që aktualisht mbetet e pezulluar, ka refuzuar të pranojë testin, duke e konsideruar kërkesën një shkelje të të drejtave njerëzore dhe profesionale. Ndërkohë, Dinamo ka zhvilluar dy ndeshje pa të, përfshirë fitoren ndaj kampiones në fuqi, Tiranës.
Ky rast ka shkaktuar reagime të forta në opinionin sportiv, ku shumë figura të njohura kanë kërkuar që institucione si Federata dhe Ministria e Sportit të sqarojnë procedurat dhe të garantojnë mbrojtjen e sportisteve nga çdo formë paragjykimi.
Dinamo, në përfundim të deklaratës, apelon për kthim të qetësisë dhe respektit në sport: “Në çdo fushë, sporti duhet të bashkojë, jo të poshtërojë. Dinjiteti i sportistes duhet të mbrohet si vlera themelore e garës së ndershme.”
About the Author
