Bisedat e SkyECC zbulojnë marrëveshje, çmime dhe garantira cilësie mes Haxhiajt dhe grupit të Visit të Pojës, ndërsa SPAK e akuzon vetëm për shpërdorim detyre dhe shitje informacioni.
Hetimet e SPAK kanë nxjerrë në dritë një rol të papritur në një prej rrjeteve më aktive të trafikut ndërkombëtar të kokainës. Ish-efektivi Igli Haxhiaj, i cili zyrtarisht nuk akuzohet për trafik droge, rezulton të ketë negociuar drejtpërdrejt me grupin e Elvis Doçit, i njohur si Visi i Pojës. Të dhënat e përgjuara në SkyECC tregojnë se ai komunikonte rregullisht me trafikantët, duke kërkuar çmime, mostra dhe garanci për cilësinë e kokainës që kalonte nga Amerika e Jugut drejt Evropës.
Bisedat e publikuara flasin për lloje të ndryshme malli, që trafikantët i identifikonin përmes shenjave si rolex, CR7, bebe apo 111. Haxhiaj kërkonte mall të pastër dhe të sigurt, ndërsa bashkëbiseduesit e tij propozonin ngarkesa të ndryshme të ardhura nga Holanda, Athina apo Roterdami, me çmime që luhateshin nga 25 deri në 31 mijë euro për kilogram sipas destinacionit dhe përzierjes.
Në një prej komunikimeve, ai konsideron çmimin si të lartë, por pranon se tregu po operon me këto vlera. Në raste të tjera, i kërkon trafikantëve të marrë një sasi të vogël për provë, duke insistuar që pagesat të bëhen vetëm në dorë. Nga ana e tyre, anëtarët e grupit shpjegojnë edhe koston e transportit, tarifat për Athinën dhe marrëveshjet për kamionët që lëviznin ngarkesat drejt Italisë.
Megjithëse grupi i Visit të Pojës dyshohet se ka transportuar rreth 1.3 tonë kokainë drejt Evropës, SPAK nuk ka sekuestruar drogë në lidhje me rolin e Haxhiajt. Për këtë arsye, ai nuk u akuzua për trafik, por për shpërdorim detyre dhe zbulim sekretesh, pasi dyshohet se i siguronte informacion rrjetit kriminal kundrejt pagesave që arrinin deri në 15 mijë euro.
Hetimi synon të zbardhë rrjetin që shtrihej nga Amerika e Jugut në Itali përmes Shqipërisë, duke përdorur linja detare, kamionë dhe korrierë që kryenin transportet e parave. Ndërkohë, autoritetet italiane po analizojnë lidhjet që grupi dyshohet të ketë pasur me Sacra Corona Unita dhe me kompani transporti që kanë ofruar mbulim logjistik.
About the Author
