Pas hetimeve për tenderat e Llogarasë dhe Unazës së Madhe, Prokuroria e Posaçme zgjeron verifikimet drejt pasurisë së ish-ministres dhe deputetit socialist Ceno Klosi
SPAK ka zyrtarizuar nisjen e procedimit penal nr. 95 të vitit 2025, i cili ka në fokus hetimin e pasurisë së ish-ministres së Infrastrukturës Belinda Balluku, aktualisht e pezulluar nga detyra dhe të deputetit të Partisë Socialiste, ish-kreut të Tatimeve Ceno Klosi. Prokuroria e Posaçme njofton se ka bashkuar në dosje edhe materiale të reja të administruara më 16 shtator, ndërsa verifikimet janë në fazën paraprake.
Sipas SPAK, po hetohet ligjshmëria e pasurisë së të dy funksionarëve, burimi i krijimit të saj dhe çdo element që lidhet me ushtrimin e detyrës në vite. Lidhur me Ceno Klosin, mediat e kanë cilësuar prej kohësh si njeriun më të besuar të Ballukut në sistemin fiskal dhe në sipërmarrjet publike, ndërsa dyshohet se ndaj tij mund të jenë zbuluar indicie mbi abuzime financiare të ngjashme me rastin e Evis Berberit, ish-drejtorit të ARRSH-së, i arrestuar pas hetimeve për përfitime të paligjshme në tendera.
Ndërkohë, GJKKO ka lënë në fuqi masat e sigurimit ndaj Belinda Ballukut, duke e mbajtur të pezulluar nga detyra dhe me ndalim të udhëtimit jashtë vendit. Gjykata arsyeton se masa është e domosdoshme për të shmangur ndikimin e saj tek provat, dëshmitarët dhe proceset administrative që lidhen me tenderat në hetim. Po ashtu, janë konfirmuar masat e arrestit në shtëpi për zyrtarët Gentian Gjyli dhe Erald Elezi.
SPAK akuzon ish-ministren dhe vartësit e saj për manipulim të tenderave me një vlerë të kombinuar prej 210 milionë eurosh, duke favorizuar kompani të paracaktuara në dy procedurat më të mëdha infrastrukturore të qeverisë. Hetimet kanë zbuluar se tenderi i Tunelit të Llogarasë u anulua dhe u rihap në rrethana të dyshimta, ndërsa në Lotin 4 të Unazës së Madhe ofertat më të ulëta janë skualifikuar në mënyrë të pashpjegueshme, duke i hapur rrugë një operatori të vetëm.
Të dyja këto procedura konsiderohen me rrezik të lartë abuzimi dhe po hetohen në dosje të bashkuara. Me nisjen e verifikimeve të pasurisë, SPAK duket se po zgjeron rrethin e hetimit për të ndriçuar jo vetëm skemat e tenderave, por edhe përfitimet personale që mund të kenë rrjedhur prej tyre.
About the Author
