Hetimi për korrupsion dhe abuzim me tenderat publikë ka hyrë në fazë aktive, me kontrolle në banesa dhe sekuestrim pajisjesh elektronike të zyrtareve kryesore të ministrisë
Hetimet e SPAK ndaj Ministrisë së Infrastrukturës dhe Energjisë janë intensifikuar, duke u përqendruar në figurat më të afërta të ministres Belinda Balluku. Burime nga organet e drejtësisë bëjnë të ditur se hetuesit kanë sekuestruar telefonat personalë të Sekretares së Përgjithshme të Ministrisë, Viola Haxhiademi, dhe të Drejtoreshës së Financave, Evis Mamaj.
Operacionet janë shoqëruar me kontrolle në banesat e tyre, ku janë kërkuar dokumente, pajisje elektronike dhe çdo provë që mund të ndihmojë në zbardhjen e skemave të dyshuara të korrupsionit dhe abuzimit me fondet publike.
Sipas burimeve, hetimi synon të zbulojë rrethin e brendshëm të ministres Balluku, zyrtarët që kanë pasur rol kyç në proceset e tenderave, koncesioneve dhe kontratave shumëmilionëshe të Ministrisë së Infrastrukturës dhe Energjisë. Haxhiademi dhe Mamaj, të njohura si bashkëpunëtoret më të afërta të saj, dyshohet se kanë pasur akses të drejtpërdrejtë në vendimmarrjet financiare dhe procedurat e prokurimeve publike.
Në qendër të hetimit ndodhen komunikimet elektronike dhe financiare, përfshirë mesazhe, emaile dhe korrespondencë të brendshme, që mund të zbulojnë bashkërendime për tendera të manipuluar, ndikime politike dhe përfitime të paligjshme.
Burime të afërta me hetimin theksojnë se SPAK ka zgjeruar analizën edhe te kontratat energjetike dhe projektet e infrastrukturës, ku janë konstatuar ndryshime të dyshimta në dokumentacionin zyrtar dhe përfshirje të kompanive të lidhura me zyrtarë të ministrisë apo me persona pranë tyre.
Sekuestrimi i telefonave dhe kontrollet në banesa tregojnë se hetimi ka hyrë në një fazë të avancuar. Strukturat e posaçme po analizojnë çdo lëvizje komunikimi dhe transaksion financiar për të ndërtuar panoramën e plotë të lidhjeve mes ministres Balluku dhe bashkëpunëtorëve të saj më të afërt.
Ky zhvillim shihet si një nga veprimet më të forta të SPAK kundrejt një institucioni qendror të qeverisë, duke sinjalizuar vullnetin për të çuar përpara hetimet pavarësisht profilit të lartë të personave të përfshirë.
Nëse akuzat për korrupsion dhe pastrim parash konfirmohen, rasti Balluku pritet të kthehet në një nga dosjet më të bujshme të drejtësisë shqiptare në vitet e fundit, duke shënuar një provë serioze për integritetin e institucioneve dhe pavarësinë e hetimeve në vend.
About the Author
