Hetimet për ngjarjet e rënda të vitit 2011 rihapen në një fazë të re, fokus te përgjegjësitë politike dhe institucionale
Prokuroria e Posaçme Kundër Korrupsionit dhe Krimit të Organizuar ka thirrur për nesër në pyetje kreun e Partisë së Lirisë, Ilir Meta, në lidhje me çështjen e njohur si 21 Janari. Burime pranë hetimit bëjnë me dije se Meta do të paraqitet për të dhënë shpjegime mbi rrethanat dhe vendimmarrjet institucionale të kohës, në kuadër të hetimeve të ripërtërira për ngjarjet tragjike të vitit 2011.
Thirrja e tij vjen në një moment kur SPAK ka intensifikuar veprimet procedurale për këtë dosje, duke rishikuar rolin e aktorëve politikë dhe zinxhirin e komandës gjatë protestës ku humbën jetën katër qytetarë. Ilir Meta, i cili në atë periudhë mbante funksione të larta shtetërore, pritet të pyetet mbi dijeninë, komunikimet dhe qëndrimet e mbajtura në ditët para dhe pas ngjarjes.
Burimet theksojnë se marrja në pyetje e Metës nuk përjashton thirrje të tjera të figurave politike dhe ish-zyrtarëve të lartë, ndërsa hetimi synon të hedhë dritë të plotë mbi përgjegjësitë penale dhe institucionale që lidhen me 21 Janarin.
Dosja konsiderohet një nga çështjet më të ndjeshme për drejtësinë shqiptare dhe rikthimi i saj në fokusin e SPAK shihet si një test i fortë për vullnetin e hetimit të ngjarjeve të së kaluarës, pavarësisht peshës politike të personave të përfshirë.
About the Author
