Hetuesit bllokojnë pajisje dhe dosje në zyrat e bashkisë, ndërsa dyshimet për tenderat dhe aferat e rindërtimit e vendosin kryebashkiaken në qendër të hetimit.
SPAK ka ndërmarrë një veprim të papritur hetimor në Bashkinë e Durrësit, duke sekuestruar kompjuterë, celularë dhe një sërë dosjesh të rëndësishme administrative. Burime nga institucioni lokal bëjnë të ditur se hetuesit kanë mbërritur pa paralajmërim dhe kanë kërkuar menjëherë akses në pajisjet elektronike të disa zyrtarëve, përfshirë punonjës të shërbimit, juristikës dhe sektorëve që lidhen me prokurimet.
Sipas informacioneve nga Durrësi, veprimet e SPAK lidhen me dyshime për ndërhyrje në tendera, komunikime të brendshme të stafit dhe ndikim nga drejtues të bashkisë. Hetuesit dyshojnë se disa punonjës kanë marrë udhëzime dhe orientime për procedura specifike, për të cilat kërkohen verifikime të hollësishme.
Pas sekuestrimit të pajisjeve elektronike, janë marrë edhe disa dosje që lidhen me proceset e rindërtimit, shërbimet publike dhe kontratat e firmave private të përfshira në punime. Burimet lokale thonë se një pjesë e dokumenteve lidhen me çështje të denoncuara më herët në media, përfshirë përdorimin e fondeve të rindërtimit, marrëdhëniet me kompani të bllokuara nga hetimet si dhe procedurat e tenderave të investimeve të ndryshme.
Hetimet e SPAK duket se shtrihen edhe përtej bashkisë, duke përfshirë individë jashtë administratës që dyshohet se kanë përfituar përmes ndërhyrjeve në këto procedura. Kryebashkiakja Emirjana Sako, e cila prej kohësh është përmendur në disa dosje hetimore, pritet të jetë një nga personat kyç që SPAK synon të verifikojë pas këtij operacioni.
Sipas burimeve, kontrollet e sotme janë vetëm hapi i parë i një hetimi më të gjerë që pritet të zbardhë mënyrën e përdorimit të fondeve dhe lidhjet mes zyrtarëve lokalë dhe përfituesve të tenderave. Durrësi është prej vitesh një nga bashkitë më të akuzuara për probleme me menaxhimin e fondeve publike, ndërsa SPAK ka intensifikuar ndërhyrjet e tij në territor.
Në pritje të zhvillimeve të tjera, operacioni i sotëm është një sinjal se hetimi pritet të zgjerohet dhe të prekë disa nivele të administratës lokale./bulevard news
About the Author
