Dokumenti i publikuar nga Shtëpia e Bardhë shënon një kthesë historike, ku aleancat tradicionale nuk konsiderohen më prioritet strategjik.
Administrata amerikane ka publikuar një dokument të ri të sigurisë kombëtare, i cili shihet si largimi më i fortë nga politika tradicionale transatlantike që prej Luftës së Dytë Botërore. Në tekst, Evropa trajtohet me kriticizëm të mprehtë dhe me vëmendje minimale, ndërsa Rusia, Kina dhe rivalë të tjerë shfaqen në një narrativë më pak konfrontuese se në dokumentet strategjike të dekadave të fundit.
Raporti i lëshuar nga Shtëpia e Bardhë më 5 dhjetor përshkruan kontinentin europian si hapësirë në rënie demografike, në krizë identitare dhe me institucione që, sipas autorëve, po dobësojnë liritë politike e shprehjen publike. Dokumenti parashikon se brenda pak dekadash disa vende të NATO-s mund të mos kenë me shumicë popullsi me origjinë europiane, teksa emigracioni cilësohet si faktor kyç transformues.
Në të njëjtën kohë, strategjia shfaq një ton më pak agresiv ndaj kundërshtarëve gjeopolitikë të SHBA, duke lënë të kuptohet se prioritetet e reja amerikane nuk janë të lidhura domosdoshmërisht me mbajtjen e aleancave tradicionale, por me interesa të drejtpërdrejta kombëtare.
Ky ndryshim i tonit dhe pozicionimit shihet nga analistët si fillimi i një epoke të re ku Uashingtoni i vendos interesat e veta mbi konsensusin me aleatët perëndimorë, duke hapur një debat të gjerë mbi të ardhmen e partneritetit euro-amerikan.
About the Author
