Forcat e Armatosura Suedeze kanë konfirmuar se po ndjekin një nëndetëse ruse që po kalon nëpër ujërat ndërkombëtare të Detit Baltik. Operacioni po zhvillohet me përfshirjen e avionëve luftarakë dhe anijeve luftarake, në bashkëpunim me aleatët e NATO.
Zëdhënësi i ushtrisë suedeze, Jonas Beltrane Linné, deklaroi se situata është nën kontroll dhe se ndjekja e nëndetëses është një procedurë rutinë që ndërmerret sa herë që anije ushtarake ruse lundrojnë pranë kufijve të aleancës. “Ajo ndodhet në ujëra ndërkombëtare dhe nuk paraqet rrezik të menjëhershëm. Po e monitorojmë në mënyrë të vazhdueshme,” tha ai për mediat lokale.
Sipas televizionit publik suedez SVT, bëhet fjalë për nëndetësen “Novorossiysk”, e cila u vu re edhe javën e kaluar nga ushtritë holandeze dhe britanike gjatë kalimit të saj në Detin e Veriut. Anija dyshohet se ka dalë nga Mesdheu dhe është përballur me probleme teknike gjatë rrugës, duke tërhequr vëmendjen e NATO.
Sekretari i përgjithshëm i NATO, Mark Rutte, e komentoi me humor situatën, duke thënë: “Në vitin 1984 kemi ndjekur ‘Gjuetinë për Tetorin e Kuq’, sot duket më shumë si gjuetia për servisin më të afërt.”
Edhe pse autoritetet suedeze e cilësojnë incidentin si rutinor, kalimet e shpeshta të anijeve ushtarake ruse në rajonin e Baltikut janë parë si pjesë e një testimi të qëndrueshëm të gatishmërisë së NATO, pas anëtarësimit të plotë të Suedisë në Aleancë. Ushtria suedeze ka shtuar patrullimet ajrore dhe detare në zonë, ndërsa bashkëpunimi me Danimarkën dhe Finlandën është intensifikuar për monitorimin e lëvizjeve ruse në veri të Evropës.
About the Author
