Pas pushimit të shkurtër, futbolli elitar shqiptar rikthehet me dy përballje interesante: kampionët në fuqi përballen me Egnatian, ndërsa Teuta kërkon të vazhdojë serinë pozitive ndaj vlonjatëve.
Kampionati shqiptar i futbollit rikthehet këtë fundjavë me emocione të reja dhe duele me peshë. Ndeshja kryesore e javës do të luhet në “Arenën e Demave”, ku Partizani do të presë Egnatian në një sfidë që pritet të jetë plot rivalitet.
Skuadra e kuqe vjen e motivuar pas fitores minimale 0-1 në transfertën e Vlorës dhe kërkon të ruajë ritmin për të mbrojtur titullin. Nga ana tjetër, Egnatia e Oltijon Kërnajës kërkon të hakmerret për humbjen e fundit dhe të tregojë forcën e saj kundër kampionëve në fuqi. Përballjet mes dy ekipeve në sezonin e kaluar kanë qenë gjithmonë të ekuilibruara, me nga një fitore për secilën dhe një barazim.
Ndërkohë, në Durrës, skuadra e Teutës do të përballet me Flamurtarin, në një takim po aq të rëndësishëm. Durrsakët nuk kanë pësuar humbje në pesë ndeshjet e fundit dhe synojnë të vazhdojnë serinë pozitive për të ngjitur më lart në renditje. Vlonjatët, që mbeten në fund të tabelës, do të kërkojnë pikët e mbijetesës në një transfertë të vështirë.
Të dyja sfidat do të luhen këtë të shtunë, në orën 17:00, në një javë ku rikthimi i Superligës premton tension, gola dhe spektakël.
About the Author
