Trupi u zbulua në Morgan Creek Meadows i rrethuar nga gëzhoja plumbash, ndërsa hetuesit po shqyrtojnë edhe një automjet të djegur pranë vendngjarjes
Një ngjarje e rëndë ka tronditur qytetin e Surrey, ku një burrë është gjetur i pajetë pas një incidenti me armë zjarri. Sipas mediave lokale, në vendngjarje janë angazhuar hetuesit e Integrated Homicide Investigation Team, të cilët po udhëheqin hetimet.
Autoritetet janë thirrur në bllokun 3600 të rrugës 176 Street, pas raportimeve për të shtëna. Trupi i viktimës është gjetur në zonën e njohur si Morgan Creek Meadows, i rrethuar nga gëzhoja plumbash, çka ka forcuar dyshimet për një vrasje të qëllimshme.
Hetuesit kanë bërë të ditur se jo shumë larg vendit ku u gjet trupi, është zbuluar edhe një automjet i djegur. Aktualisht nuk është konfirmuar nëse ky mjet lidhet drejtpërdrejt me vrasjen, por pista po analizohet si pjesë e hetimit.
Autoritetet po shqyrtojnë gjithashtu nëse kjo ngjarje ka lidhje me raste të tjera të fundit në rajon, përfshirë zbulimin e një trupi në një banesë të djegur në Surrey dhe vdekjen e një burri në Abbotsford disa ditë më parë. Sipas zyrtarëve të hetimit të vrasjeve, të dyja rastet e fundit duket se kanë qenë sulme të synuara.
Ngjarja vjen në një periudhë kur në zonën e Lower Mainland është shënuar një valë incidentesh me armë zjarri, të cilat sipas autoriteteve lidhen me kërcënime për zhvatje, kryesisht ndaj komunitetit të Azisë Jugore në British Columbia.
Hetimet janë në vijim, ndërsa policia u bën thirrje qytetarëve që të ofrojnë çdo informacion që mund të ndihmojë në zbardhjen e plotë të kësaj ngjarjeje.
About the Author
