Lëkundja me magnitudë 4.0 u regjistrua pranë ishullit Mljet dhe u ndje përgjatë bregdetit jugor të Kroacisë
Një tërmet me magnitudë 4.0 është regjistruar mbrëmjen e së mërkurës në Detin Adriatik, pranë ishullit Mljet, duke u ndjerë edhe në zonën e Dubrovnikut. Sipas Shërbimit Sizmologjik të Kroacisë, lëkundja ndodhi në orën 23:07 të datës 17 dhjetor 2025.
Epiqendra e tërmetit u lokalizua në Detin Adriatik, pranë Mljetit, me koordinata 42.657 gjerësi veriore dhe 17.618 gjatësi lindore, në një thellësi rreth një kilometër. Intensiteti në epiqendër u vlerësua në shkallën V të shkallës EMS, ndërsa magnituda ishte 4.0 në shkallën Rihter.
Shërbimi Sizmologjik konfirmoi se tërmeti u ndje qartë përgjatë Bregut të Dubrovnikut, ndërsa Qendra Europiane e Sizmologjisë Mesdhetare raportoi fillimisht një magnitudë 3.9 për të njëjtën ngjarje sizmike.
Pas lëkundjes, qytetarë nga zona të ndryshme kanë lënë dëshmi në faqen e EMSC. Në Babino Polje, në ishullin Mljet, banorë raportuan se tërmeti ishte i fortë, por me kohëzgjatje të shkurtër. Në Orashac, pranë Dubrovnikut, lëkundja u përshkrua si e shkurtër dhe e lehtë, megjithëse mjaftueshëm e ndjeshme për të shkaktuar dridhje të objekteve të lehta në ambiente të brendshme.
Nga informacionet paraprake nuk raportohet për dëme materiale apo persona të lënduar. Autoritetet vijojnë monitorimin e situatës sizmike në zonë.
About the Author
