Shkencëtarët paralajmërojnë katastrofën e madhe që po afrohet nga deti, bota s’ka më kohë për të shpëtuar bregdetet e saj.
Një studim i ri nga Universiteti McGill në Montreal ka tronditur komunitetin shkencor: nëse ngrohja globale nuk frenohet, mbi 100 milionë ndërtesa në të gjithë botën mund të përfundojnë nën ujë deri në fund të këtij shekulli.
Sipas hulumtimit, një rritje e nivelit të detit me vetëm gjysmë metri do të mjaftonte për të zhdukur miliona ndërtesa në Afrikë, Azinë Juglindore dhe Amerikën Latine. Por nëse shkrirja e akullnajave vijon me ritmin aktual, valët mund të përpijnë deri në 20 metra territor, duke zhytur qindra qytete dhe portet më të mëdha të botës.
Profesorja Natalya Gomez, një nga autoret kryesore të studimit, paralajmëron se ky është një proces i ngadaltë, por i pandalshëm, që do të ndikojë për shekuj me radhë në mënyrën si jetojmë.
Sipas saj, edhe nëse respektohen kufijtë e Marrëveshjes së Parisit, rritja me 0.9 metra është tashmë e pashmangshme, duke rrezikuar miliona ndërtesa deri në vitin 2100.
Ekspertët theksojnë se pasojat nuk do të jenë vetëm ekologjike: qindra porte, rafineri dhe qendra tregtare bregdetare do të përmbyten, duke shkaktuar kolaps ekonomik global dhe ndërprerje të zinxhirëve të furnizimit.
Ndërsa valët ngrihen dhe bregdetet zhyten, njerëzimi përballet me një pyetje ekzistenciale: A do të reagojmë sot, apo do të presim që deti të marrë gjithçka?
About the Author
