Kreu i Partisë Socialdemokrate është thirrur nga Prokuroria e Posaçme për të dhënë shpjegime lidhur me një çështje që ndodhet në fazë hetimore, ndërsa burime konfirmojnë se prania e tij lidhet me një procedim në vazhdim.
Kreu i Partisë Socialdemokrate, Tom Doshi, është paraqitur sot në ambientet e Prokurorisë së Posaçme (SPAK). Sipas burimeve, Doshi është thirrur për t’u marrë në pyetje në kuadër të një hetimi që po zhvillohet nga prokurorët e posaçëm.
Ende nuk dihet nëse ai është thirrur si person në cilësinë e dëshmitarit apo për të dhënë sqarime lidhur me ndonjë procedim konkret. Burime nga organi i akuzës bëjnë me dije se paraqitja e tij është pjesë e një faze hetimore që përfshin disa çështje të ndërlidhura, por nuk kanë dhënë detaje të mëtejshme për përmbajtjen e dosjes.
Tom Doshi ka hyrë në ambientet e SPAK në orët e mesditës dhe ka refuzuar të japë deklarata për mediat, duke u shprehur se “është një procedurë e zakonshme”.
Kujtojmë se gjatë viteve të fundit, Doshi ka qenë disa herë në qendër të vëmendjes për shkak të hetimeve që lidhen me financimet e fushatave elektorale dhe marrëdhëniet e tij me figura politike e ekonomike. Megjithatë, deri më tani ai nuk është akuzuar drejtpërdrejt për ndonjë vepër penale.
SPAK pritet të japë më shumë informacion mbi arsyen e thirrjes së tij në orët në vijim, ndërsa burime nga brenda institucionit pohojnë se hetimet janë ende në zhvillim.
About the Author
