Një ngjarje e pabesueshme dhe tragjike ka tronditur fshatin e vogël Bissy-sur-Fley në Francë, ku një grua në të 60-at humbi jetën në rrethana të pazakonta, ndërsa pastronte makinën e saj. Viktima, Bernadette Delmotte, u gjet e pajetë brenda Fiat-it të saj të kuq, pas një aksidenti të çuditshëm që autoritetet e përshkruan si të paprecedent.
Hetuesit fillimisht mbetën të habitur për mënyrën se si kishte ndodhur vdekja, duke mos gjetur asnjë shenjë dhune apo ndërhyrjeje të jashtme. Por pas hetimeve, rezultoi se Bernadette ishte përkulur përmes dritares për të tërhequr frenin e dorës, dhe pa dashje kishte shtypur butonin e kontrollit automatik të dritares. Dritarja ishte mbyllur duke i bllokuar qafën dhe duke i shkaktuar vdekje nga asfiksia.
Një mike e saj, Béatrice, e përshkroi ngjarjen si të paimagjinueshme: “Në fillim menduam se kishte pësuar një atak në zemër, ose se dikush mund ta kishte sulmuar. Askush nuk mund ta mendonte se ajo do të vdiste në këtë mënyrë.”
Sipas raportit të policisë, makina kishte filluar të lëvizte pasi nuk ishte vënë në fren dore. Në përpjekje për ta ndalur, Bernadette ishte hedhur përmes dritares për të tërhequr frenin, por gjatë lëvizjes aksidentalisht kishte shtypur butonin që mbylli xhamin, duke e zënë në kurth fatal.
Autopsia konfirmoi se vdekja kishte ardhur për shkak të asfiksisë, ndërsa hetuesit përjashtuan çdo mundësi të ndonjë veprimi kriminal.
Vëllai i viktimës, François, i tronditur nga humbja, tha se kishte kontaktuar kompaninë Fiat për të treguar rastin e motrës së tij. “Nuk kërkoj dëmshpërblim, asgjë nuk do ma kthejë motrën. Dua vetëm që kjo tragjedi të shërbejë si paralajmërim për të tjerët, që të mos ndodhin më raste të tilla,” u shpreh ai me dhimbje.
Ngjarja ka hapur diskutime të reja në Francë mbi sigurinë e mekanizmave automatikë në automjete, duke kujtuar se edhe veprimet më të zakonshme mund të kthehen në tragjedi.
About the Author
