Avioni humbi kontaktin në mes të fluturimit në një zonë malore dhe me mot të keq, autoritetet konfirmojnë se nuk ka të mbijetuar
Një aksident i rëndë ajror ka tronditur Kolumbinë mbrëmjen e së mërkurës, pasi një avion i linjës shtetërore Satena u rrëzua gjatë fluturimit, duke shkaktuar vdekjen e të gjithë personave që ndodheshin në bord. Avioni transportonte 15 persona, përfshirë 13 pasagjerë dhe 2 anëtarë të ekuipazhit.
Autoritetet kolumbiane konfirmuan se avioni humbi çdo kontakt me kullën e kontrollit pak minuta para uljes së planifikuar, ndërsa më vonë u bë e ditur se nuk kishte asnjë të mbijetuar. Mes viktimave ndodhej edhe deputeti i Dhomës së Përfaqësuesve, Diógenes Quintero, si dhe kandidati politik Carlos Salcedo Salazar.
Fluturimi ishte nisur nga qyteti Cúcuta dhe kishte si destinacion Ocaña, pranë kufirit me Venezuelën. Sipas të dhënave paraprake të fluturimit, avioni pësoi një rënie të papritur në lartësi rreth 11 minuta para mbërritjes së planifikuar, përpara se të zhdukej nga radarët.
Ministrja e Transporteve e Kolumbisë deklaroi se të gjitha strukturat shtetërore janë angazhuar në operacionin e kërkim-shpëtimit, përfshirë ushtrinë dhe autoritetet e aviacionit civil. Zona ku dyshohet se është rrëzuar avioni ndodhet në rajonin Catatumbo, një territor i thellë malor dhe me pyje të dendura, çka ka vështirësuar ndjeshëm operacionet në terren.
Sipas burimeve zyrtare, kushtet e motit në momentin e fluturimit kanë qenë të pafavorshme dhe po hetohet nëse ato kanë ndikuar në aksident. Ende nuk ka një konfirmim përfundimtar mbi shkaqet e rrëzimit, ndërsa hetimet janë në fazë të hershme.
Satena Airlines bëri të ditur se ka vënë në dispozicion të gjitha burimet për të ndihmuar autoritetet dhe shprehu ngushëllime për familjet e viktimave. Edhe partitë politike dhe përfaqësues të institucioneve shtetërore reaguan me mesazhe zie, duke e cilësuar ngjarjen si një humbje të rëndë për vendin.
Autoritetet pritet të publikojnë informacione të tjera në vijim, sapo të përfundojë identifikimi i plotë i viktimave dhe analizimi i të dhënave të fluturimit.
About the Author
