I riu po kryente riparime në një shtyllë elektrike kur ra në kontakt me rrymën dhe humbi jetën në vend.
Një ngjarje e rëndë është shënuar këtë të diel në lagjen “Salo Halili” të Shkodrës, ku 38-vjeçari Arvjo Fishta ka humbur jetën gjatë kryerjes së detyrës. Ai ishte punonjës i një kompanie interneti dhe po punonte për të rregulluar një kabllo në një shtyllë elektrike, kur dyshohet të ketë rënë në kontakt me energjinë elektrike.
Ngjarja ka ndodhur rreth orës 10:25. Pavarësisht ndërhyrjes së shpejtë, Fishta nuk ka mundur të mbijetojë për shkak të goditjes fatale nga rryma.
Policia dhe grupi hetimor ndodhen në vendngjarje për të sqaruar rrethanat dhe përgjegjësitë e mundshme, ndërsa po verifikohen kushtet e sigurisë në të cilat po kryhej puna.
Arvjo Fishta njihej gjithashtu si ish-trajner portierësh në futbollin lokal. Ai ka lënë pas dy fëmijë, duke lënë një boshllëk të rëndë për familjen dhe komunitetin që e njihte.
Ngjarja ka shkaktuar dhimbje dhe reagim të gjerë në Shkodër, ku shumë qytetarë kanë kërkuar rritje të standardeve të sigurisë për punëtorët në terren.
About the Author
