Një valë e fuqishme i tërhoqi drejt detit, ndërsa një qytetar 67-vjeçar sakrifikoi jetën në tentativë për shpëtim
Një ngjarje e rëndë ka tronditur Britaninë e Madhe pasditen e së premtes në plazhin e Withernsea, ku një nënë 45-vjeçare dhe vajza e saj 15-vjeçare humbën jetën pasi u përfshinë nga dallgë të fuqishme të detit. Viktimat janë identifikuar si Sarah Keeling dhe vajza e saj Grace Keeling.
Sipas autoriteteve, vajza adoleshente ndodhej pranë bregut kur u godit papritur nga një valë e fortë dhe u tërhoq drejt thellësisë. Nëna e saj hyri menjëherë në det për ta ndihmuar, por edhe ajo u përfshi nga rrymat e rrezikshme.
Në vendngjarje ndërhyri edhe Mark Ratcliffe, 67 vjeç, një qytetar që ndodhej në plazh dhe që, pasi dëgjoi thirrjet për ndihmë, u fut në det pavarësisht kushteve ekstreme. Dëshmitarët raportojnë se dallgët arrinin deri në 12 metra lartësi. Fatkeqësisht, edhe ai humbi jetën gjatë përpjekjes për shpëtim.
Familja e Mark Ratcliffe e ka cilësuar atë si një hero të vërtetë dhe një njeri jashtëzakonisht vetëmohues, i cili dha jetën duke u përpjekur të shpëtonte të tjerët.
Policia e Humberside dhe shërbimet e emergjencës kanë nisur hetimet për rrethanat e plota të ngjarjes, ndërsa autoritetet u kanë bërë thirrje qytetarëve të tregojnë kujdes maksimal në zonat bregdetare, sidomos gjatë kushteve të paqëndrueshme atmosferike.
Ngjarja ka shkaktuar dhimbje dhe trishtim të thellë në komunitetin lokal, ndërsa plazhi i Withernsea është shndërruar në një vend homazhesh për viktimat e kësaj tragjedie.
About the Author
