Një natë e zakonshme pune u kthye në makth për familjen dhe shokët e 17-vjeçarit Leandro Shametaj, i cili humbi jetën teksa po kthehej në shtëpi pas turnit në një lokal në Vlorë.
Një ngjarje e rëndë ka tronditur qytetin e Vlorës mbrëmjen e djeshme, ku një 17-vjeçar humbi jetën tragjikisht në një aksident rrugor. Leandro Shametaj po udhëtonte me motorin e tij “Trinity” rreth orës 01:30 pas mesnate, pasi kishte mbyllur turnin e dytë në punën e tij si kamarier. I riu po kthehej drejt shtëpisë për të ndihmuar familjen me të ardhurat e përditshme, por rruga e tij u ndërpre përgjithmonë.
Në morgun e spitalit, dhimbja ishte e padurueshme. Gjyshi i Leandros, me lot në sy, tha se nipi i tij ishte “një djalë punëtor, i qetë dhe i ndershëm”, që sakrifikonte për të ndihmuar familjen e tij. “E vranë në rrugë… Ai ishte vetëm 17 vjeç,” u shpreh ai me zë të dridhur.
Lajmi i trishtë ka përfshirë në zi edhe shkollën ku Leandro ndiqte mësimet. Bashkëmoshatarët dhe mësuesit e tij kanë vendosur një pankartë përpara shkollës me mesazhin prekës “Gëzo me engjëjt, Leandro”, duke i dhënë lamtumirën e fundit me lot dhe lule në duar.
Në një qytet ku rrugët marrin shpesh jetë të reja, vdekja e Leandros ka lënë pas një boshllëk të madh — një familje të thyer nga dhimbja dhe një bankë shkollore që do të mbetet bosh përherë.
About the Author
