Presidenti amerikan shfaqet me smoking gjatë një fluturimi zyrtar dhe paralajmëron Teheranin mes retorikës së ashpër dhe sinjaleve për negociata
Presidenti amerikan Donald Tramp ka lëshuar një tjetër paralajmërim të fortë ndaj Iranit, duke deklaruar se anije të mëdha dhe shumë të fuqishme të marinës amerikane janë nisur drejt Lindjes së Mesme. Deklarata u bë nga bordi i Air Force One, ku Tramp u shfaq i veshur me smoking, teksa iu përgjigj pyetjeve të gazetarëve mbi zhvillimet e fundit me Teheranin.
I pyetur për qëndrimin aktual të Shteteve të Bashkuara ndaj Iranit, Tramp u shpreh se nuk mund të japë detaje, por konfirmoi lëvizjet ushtarake në rajon. Ai theksoi se shpreson në arritjen e një marrëveshjeje të negociuar, e cila sipas tij duhet të përjashtojë çdo mundësi që Irani të pajiset me armë bërthamore.
Deklaratat vijnë pak ditë pasi Tramp paralajmëroi Teheranin se ose do të pranonte një marrëveshje bërthamore, ose do të përballej me një ofensivë ushtarake shkatërruese. Sipas tij, koha për negociata po mbaron, ndërsa administrata amerikane mbetet e gatshme të veprojë me shpejtësi dhe forcë nëse situata përshkallëzohet.
Nga ana tjetër, autoritetet iraniane e kanë cilësuar çdo sulm amerikan si akt lufte. Misioni i Iranit në Kombet e Bashkuara ka deklaruar se vendi është i hapur për dialog mbi bazën e respektit të ndërsjellë, por ka paralajmëruar se do të reagojë fuqishëm në rast agresioni.
Retorika është ashpërsuar edhe më tej nga ministri i Jashtëm iranian, Abbas Araghchi, i cili ka deklaruar se forcat e armatosura iraniane janë gati të përgjigjen menjëherë ndaj çdo kërcënimi. Tensionet mes Uashingtonit dhe Teheranit mbeten të larta, ndërsa zhvillimet pritet të kenë ndikim të drejtpërdrejtë në stabilitetin e rajonit.
\
About the Author
