Presidenti amerikan thotë se ekzekutimet do të kenë pasoja të rënda, ndërsa flet për fitore dhe operacione të mëparshme ushtarake të SHBA-së
Presidenti i Shtetet e Bashkuara, Donald Tramp, ka paralajmëruar Iranin me reagim të ashpër nëse autoritetet iraniane fillojnë ekzekutimin me varje të protestuesve që kanë dalë në rrugë kundër regjimit.
Gjatë një interviste për CBS Evening News, të dhënë në ambientet e një fabrike të Fordit në Dearborn, Michigan, Tramp u pyet për zhvillimet e fundit në Iran, përfshirë informacionet mbi ekzekutimet e para të protestuesve, të planifikuara për ditët në vijim. Ai u shpreh se nuk ishte në dijeni të plotë për këto raste, por theksoi se nëse një gjë e tillë ndodh, reagimi i SHBA-së do të jetë i menjëhershëm dhe i fortë.
Sipas Tramp, ekzekutimi i protestuesve do të përbënte një vijë të kuqe. Ai deklaroi se Shtetet e Bashkuara do të ndërmarrin veprime shumë të forta nëse autoritetet iraniane vijojnë me dënime kapitale ndaj qytetarëve që protestojnë.
I pyetur për qëllimin përfundimtar të qëndrimit amerikan ndaj Iranit, Tramp u përgjigj shkurt se synimi është fitimi, duke shtuar se sipas tij SHBA tashmë po fiton. Ai e lidhi këtë qasje me atë që e cilësoi si suksese të mëparshme të administratës së tij, duke përmendur operacione të rëndësishme ushtarake dhe ndërhyrje të drejtpërdrejta kundër kundërshtarëve të SHBA-së në rajone të ndryshme.
Tramp u rikthye te çështja e Iranit edhe pas mbërritjes me Air Force One, duke theksuar se numri i viktimave nga protestat është i konsiderueshëm dhe se administrata e tij po punon për të siguruar shifra të sakta. Aktualisht, vlerësimet publike për të vrarët variojnë nga disa qindra deri në mbi dhjetë mijë persona.
Megjithëse nuk dha detaje konkrete për hapat e ardhshëm ndaj Teheranit, presidenti amerikan minimizoi kërcënimet iraniane për hakmarrje ndaj trupave amerikane, duke kujtuar se edhe më parë kërcënime të ngjashme nuk janë materializuar. Ai shtoi se Irani, dikur një vend ku investonin miqtë e tij gjatë kohës së shahut, sot ndodhet në një gjendje që e përshkroi si ferr.
Deklaratat e Tramp vijnë në një moment tensioni të lartë në Lindjen e Mesme dhe pritet të ndikojnë ndjeshëm në zhvillimet diplomatike dhe të sigurisë në rajon.
About the Author
