Presidenti amerikan ashpërson tonet ndaj Petro dhe Díaz-Canel, i akuzon për drogë, dështim shtetëror dhe lidhje me regjimin e Maduros
Presidenti i Shteteve të Bashkuara, Donald Tramp, ka lëshuar një paralajmërim të fortë ndaj Colombia dhe Cuba, vetëm pak orë pas sulmeve amerikane në Venezuelë dhe arrestimit të presidentit Nicolás Maduro.
Gjatë konferencës për shtyp në Mar-a-Lago, Tramp përsëriti akuzat ndaj presidentit kolumbian Gustavo Petro, duke e lidhur drejtpërdrejt me prodhimin dhe trafikun e kokainës drejt Shteteve të Bashkuara. Ai deklaroi se Petro ka struktura dhe fabrika për prodhimin e drogës dhe se duhet të ketë kujdes për veten, një deklaratë që u interpretua gjerësisht si kërcënim i drejtpërdrejtë politik.
Tramp rikujtoi se edhe më herët e kishte cilësuar Petron si problematik, duke shtuar se kritikat e vazhdueshme të presidentit kolumbian ndaj operacionit amerikan në Venezuelë nuk do të kalojnë pa pasoja.
Në të njëjtën linjë, presidenti amerikan ashpërsoi gjuhën edhe ndaj Kubës, të cilën e cilësoi si një shtet në dështim. Ai theksoi se regjimi kuban, i udhëhequr nga Miguel Díaz-Canel, ka shkaktuar vuajtje për popullin për dekada dhe se Havana ka mbështetur drejtpërdrejt Maduron, përfshirë sigurimin e rojeve të tij personale dhe varësinë nga nafta venezuelane.
Tramp deklaroi se SHBA dëshiron të ndihmojë popullin kuban, por edhe komunitetin e madh të emigrantëve kubanë që janë larguar me forcë nga vendi dhe jetojnë në Shtetet e Bashkuara.
Deklaratat u përforcuan edhe nga Sekretari i Shtetit Marco Rubio, i cili e quajti regjimin kuban një katastrofë të drejtuar nga udhëheqës të paaftë, duke sinjalizuar një linjë edhe më të ashpër të administratës Tramp ndaj vendeve të Amerikës Latine që konsiderohen armiqësore ndaj interesave amerikane.
Paralajmërimet e fundit tregojnë se pas Venezuelës, presioni diplomatik dhe politik i SHBA-së mund të zgjerohet edhe ndaj shteteve të tjera të rajonit, duke rritur ndjeshëm tensionet në hemisferën perëndimore.
About the Author
