Në Forumin Ekonomik Botëror, Tramp kritikon ashpër Europën, kërcënon me tarifa dhe shpall suksesin ekonomik amerikan si model për botën
Në fjalimin e tij shumë të pritur në Forumin Ekonomik Botëror në Davos, presidenti amerikan Donald Trump ka rindezur tensionet me Evropën, duke deklaruar se Shtetet e Bashkuara janë e vetmja fuqi e madhe e aftë të mbrojë Groenlandën dhe duke akuzuar aleatët europianë për drejtim të gabuar politik dhe ekonomik.
Tramp u shpreh se Evropa nuk po ecën në drejtimin e duhur, duke veçuar politikat e migracionit dhe energjisë, ndërsa theksoi se disa vende europiane janë bërë të panjohshme krahasuar me dekadat e mëparshme. Ai shtoi se emigracioni i paligjshëm masiv ka dëmtuar potencialin e kontinentit dhe ka sjellë pasoja të rënda sociale.
Në qendër të fjalimit ishte edhe Groenlanda, për të cilën Tramp deklaroi se asnjë vend apo grup vendesh nuk është në gjendje ta mbrojë, përveç Shteteve të Bashkuara, duke theksuar rolin e NATO-s dhe detyrimet e aleancës për sigurinë territoriale. Këto deklarata janë pritur me shqetësim nga liderët europianë, të cilët kanë reaguar duke theksuar sovranitetin e Danimarkës dhe të vetë Groenlandës.
Presidenti amerikan nuk kurseu as paralajmërimet ekonomike, duke justifikuar kërcënimet për tarifa të reja ndaj vendeve që, sipas tij, sillen padrejtësisht ndaj SHBA-së. Ai tha se politika e tij synon të mbrojë prodhuesit amerikanë dhe të detyrojë vendet e huaja të paguajnë koston e dëmeve të shkaktuara ndaj ekonomisë amerikane.
Tramp e cilësoi situatën aktuale në SHBA si një mrekulli ekonomike, duke pretenduar se inflacioni është mposhtur, kufijtë janë forcuar dhe rritja ekonomike ka arritur nivele historike. Sipas tij, rritja e Amerikës përkthehet automatikisht në rritje globale, ndërsa dobësimi i saj do të sillte pasoja negative për të gjithë botën.
Fjalimi në Davos ka thelluar ndarjet mes Uashingtonit dhe kryeqyteteve europiane, duke sinjalizuar një fazë të re përplasjesh politike dhe ekonomike mes dy brigjeve të Atlantikut.
About the Author
