Tronditje në avionin e easyJet, familja tenton të udhëtojë me të afërmen e vdekur

E moshuara 89-vjeçare u fut në avion me karrocë në Málaga, stafi u njoftua se ajo ishte vetëm e lodhur

Një ngjarje e pazakontë dhe tronditëse është shënuar në një fluturim të easyJet nga Málaga drejt Gatwick, ku një familje dyshohet se tentoi të udhëtonte me trupin e pajetë të të afërmes së tyre 89-vjeçare.

Sipas dëshmive të pasagjerëve, gruaja e moshuar u fut në avion me karrocë invalidësh dhe u ul në sedilje me ndihmën e familjarëve, të cilët i thanë ekuipazhit se ajo ishte thjesht e lodhur. Të pranishmit vunë re se ajo nuk reagonte, por pavarësisht kësaj, hipja në avion u lejua fillimisht.

Fluturimi u ndal papritur në pistë, pak para ngritjes, pasi ekuipazhi kuptoi se pasagjerja nuk kishte shenja jete. Autoritetet u thirrën menjëherë dhe gruaja u shpall e vdekur brenda avionit, çka solli pezullimin e udhëtimit dhe largimin e saj nga mjeti ajror.

Pasagjerë që ndodheshin pranë familjes treguan se të afërmit përpiqeshin ta zgjonin dhe t’i jepnin ujë, duke u sjellë sikur ajo ishte ende gjallë. Disa prej tyre shprehën indinjatë, duke ngritur dyshime se qëllimi mund të ketë qenë shmangia e procedurave dhe kostove të riatdhesimit të trupit.

Autoritetet spanjolle konfirmuan se ishin thirrur për një emergjencë mjekësore dhe se e moshuara u shpall e vdekur në avion, i cili ishte planifikuar të nisej drejt Londrës. Ndërkohë, easyJet deklaroi se pasagjerja kishte pasur një certifikatë që e konfirmonte të aftë për të fluturuar dhe se fluturimi u kthye në vendparkim sapo u raportua nevoja për ndihmë urgjente mjekësore.

Rrethanat e sakta dhe veprimet e familjarëve pas incidentit mbeten ende të paqarta, ndërsa ngjarja ka shkaktuar reagime të forta dhe debate mbi kontrollet shëndetësore dhe përgjegjësitë para fluturimeve.