Nën tingujt e “Thriller” nga Michael Jackson, çifti presidencial priti dhjetëra familje dhe fëmijë të veshur me kostume në një atmosferë festive dhe simbolike në oborrin jugor të Shtëpisë së Bardhë.
Shtëpia e Bardhë u kthye mbrëmjen e së enjtes në një skenë të gjallë festimi, ndërsa presidenti amerikan Donald Trump dhe zonja e parë Melania pritën qindra fëmijë dhe familje për festën tradicionale të Halloween-it.
Nën ritmet ikonike të “Thriller” nga Michael Jackson, çifti presidencial doli në oborrin jugor për të mirëpritur të ftuarit, në një atmosferë të mbushur me dritë, muzikë dhe ngjyra. Edhe pse shumë fëmijë ishin veshur si superheronj, princesha apo madje edhe si vetë Trump dhe Melania, çifti presidencial zgjodhi të qëndronte me veshje formale. Trump kishte veshur kostumin klasik blu me kravatë të kuqe dhe kapele me mbishkrimin “USA”, ndërsa Melania mbante një pallto kafe mbi një fustan portokalli elegant.
Fëmijët morën çokollata “Hershey” dhe “Twizzlers”, të vendosura në kuti me vulën presidenciale, ndërsa presidenti nuk la pa bërë shaka për radhën e gjatë të vizitorëve. “Është një radhë e gjatë, pothuajse sa salla e ballove,” tha ai me humor, duke iu referuar punimeve për ndërtimin e sallës së re në Krahun Lindor të Shtëpisë së Bardhë, ku ende shihej një buldozer i parkuar pranë zonës së festës.
Në aktivitet morën pjesë edhe anëtarë të administratës, përfshirë zëdhënësen Karoline Leavitt me familjen, si dhe këshilltarin Stephen Miller. Ngjarja u zhvillua në një atmosferë të ngrohtë dhe familjare, duke rikthyer një traditë që për disa vite ishte ndërprerë në Shtëpinë e Bardhë.
Për Trump, kjo ishte një mundësi për të treguar anën më të butë të jetës presidenciale, ndërsa për Melanian, një rikthim në një skenë që dikur e kishte bërë ikonë të elegancës në Uashington.
About the Author
