Presidenti amerikan akuzon demokratët për lidhje me Jeffrey Epstein, ndërsa media e quan këtë një manovër politike për të shmangur vëmendjen nga përfshirja e tij në skandal.
Presidenti amerikan Donald Tramp ka urdhëruar Departamentin e Drejtësisë dhe FBI të nisin një hetim mbi lidhjet mes ish-presidentit Bill Clinton, figurave të tjera të Partisë Demokratike dhe financierit të ndjerë Jeffrey Epstein. Vendimi erdhi pasi një sërë e-mailesh të publikuar këtë javë nga ligjvënësit demokratë sugjeronin se Trump ka pasur dijeni për abuzimet seksuale të Epstein dhe se ka kaluar orë të tëra me një nga viktimat.
Media amerikane e cilëson lëvizjen e Tramp si një taktikë klasike diversioniste për të zhvendosur vëmendjen publike nga përmendja e tij e shpeshtë në dokumentet e fundit të publikuara. New York Times shprehet se ndërsa emri i presidentit shfaqej shpesh në korrespondencën e Epstein, Tramp zgjodhi të përmendë vetëm demokratët dhe të shmangë çdo referencë ndaj vetes.
Gjithashtu bie në sy reagimi i menjëhershëm i prokurores së përgjithshme Pam Bondi, e cila katër muaj më parë kishte deklaruar se dosjet e Epstein nuk përmbanin asnjë arsye për hetime të reja. Kritikat ndaj saj dhe ndaj ndërhyrjes së presidentit janë të forta, veçanërisht për shkeljen e parimit të pavarësisë së Departamentit të Drejtësisë nga politika e Shtëpisë së Bardhë.
Në listën e personave që Tramp ka kërkuar të hetohen përfshihen Bill Clinton, ish-sekretari i Thesarit Lawrence Summers dhe themeluesi i LinkedIn, Reid Hoffman. Ligat e vjetra të këtyre figurave me Epstein janë të dokumentuara, por deri më sot nuk ka pasur akuza të besueshme ndaj tyre për sjellje të pahijshme.
Skandali po krijon tension edhe në kampin republikan. Kongresistja Marjorie Taylor Greene, dikur një nga aleatet më të zëshme të Tramp, e ka kritikuar presidentin për mungesë transparence lidhur me dosjet e Epstein. Përgjigjja e Tramp ishte e ashpër, duke shpallur publikisht se do të mbështesë një kandidat kundër saj në zgjedhjet e ardhshme.
Publikimi i dokumenteve të reja dhe përplasjet politike që i shoqërojnë i kanë rikthyer sërish në qendër të vëmendjes lidhjet e errëta që Jeffrey Epstein ndërtoi për dekada me politikanë, miliarderë dhe figura publike, ndërsa presioni ndaj Trump për të zbuluar të gjithë dosjen mbetet më i larti i viteve të fundit.
About the Author
